Осомничениот со возило ја однела поранешната партнерка во викендица во Нижеполе, каде што ја затворил и еден час ја удирал со шлаканици, тупаници и клоци по главата и телото, а откако таа со нож си ги исекла вените на левата рака битолчанецот продолжил свирепо да ја удира жената
Основното јавно обвинителство Битола отворило постапка против 39-годишен жител на градот, осомничен дека лишел од слобода ѝ нанел телесна повреда на својата поранешна партнерка.
Како што информираат од Јавното обвинителство, настанот за кој се товари битолчанецот се случил на 21 октомври во својата викендица во селото Нижеполе.
„Оштетената, пред нејзината куќа, влегла во неговото возило. Тој започнал да вози и најпрво со тупаница ја удрил во пределот на главата. Потоа ја однел во неговата викендица во Нижеполе, каде што насилно ја турнал, ја заклучил и додека ја држел затворена, еден час ја удирал со шлаканици, тупаници и клоци по главата и телото“,
стои во соопштението од ОЈО.
Жената, се додава во описот на случајот, не можејќи да го издржи насилничкото однесување, посегнала по нож од кујната со кој си ги исекла вените на левата рака. По ова, осомничениот продолжил свирепо да ја удира жената, со што ѝ нанел повеќе телесни повреди.
Судијата, како што се додава, го прифатил предлогот за определување мерка притвор, но поради тоа што осомничениот е во бегство таа ќе почне да се спроведува сметано од денот на неговото пронаоѓање, лишување од слобода и приведување.