Обвинителката од Специјалното јавно обвинителство Лиле Стефанова, која го води предметот „Империја“, денеска изјави дека сите списи и барањата за мерките за обезбедување ги потпишувала шефицата Катица Јанева. Стефанова не стравува дека истрагата на Обвинителството за гонење организиран криминал ќе ја опфати и неа, а на прашањето дали Јанева треба да стравува, ги упати новинарите да ја прашаат лично неа.
„Согласно Законот за СЈО, сите одлуки, секој спис кој ќе излезе од ова обвинителство, единствено го потпишува специјалната обвинителка Катица Јанева и во нејзино име, кога е отсутна, овластени јавни обвинители. Немам потпишано ниту една одлука која излегла од ова јавно обвинителство. Ниту мислењата за пуштање од притвор во куќен притвор“,
изјави Стефанова.
Стефанова беше присутна на денешната прес-конференција, на која тимот обвинители од СЈО излезе пред јавноста без Катица Јанева. Тие се оградија од шефицата и посочија дека им стојат на располагање на колегите од Обвинителството за гонење на организиран криминал за евентуални барања поврзани со истрагата „Рекет“. Обвинителскиот тим од СЈО, без Јанева, повика и да се почитува презумпцијата на невиност и да не се загрозува интегритетот на СЈО поради индивидуални постапки.
Од Основното јавно обвинителство доцна синоќа за „360 Степени“ потврдија дека е одземен мобилен телефон на шефицата на СЈО Катица Јанева. Во денешното соопштение од обвинителството за претресите направени во домовите на осомничените и за одземените предмети, не се споменува телефонот на Катица Јанева.
- поврзана вест: Историјата на една „Империја“