Јавниот оглас за избор на директор на Академијата беше објавен на 26 август годинава откако поранешната директорка, Наташа Габер-Дамјановска, поднесе неотповиклива оставка од функцијата кон средината на јули
Со шест гласа „за“, Управниот одбор на Академијата за судии и јавни обвинители „Павел Шатев“ денеска одлучи новиот, четиригодишен мандат, да ѝ го довери на обвинителката Ирина Трајкоска-Стрезоски од Вишото јавно обвинителство-Битола.
Еден глас помалку, односно пет гласови при денешниот избор доби судијата Ненад Савески од Основниот кривичен суд-Скопје, а трет, со три освоени гласа беше заменик-директорот на Академијата, Илир Исени.
Судијката Оља Ристова од Кривичен суд и судијата Андреј Димовски од Граѓанскиот суд не освоија ниту еден глас. Судијката Едита Насковска од Управен суд доби два, а обвинителката Спасенка Андонова од Основното јавно обвинителство Скопје еден глас.
Претходно на седницата дел од членовите на УО посочија дека сите пријавени кандидати ги исполнувале условите за избор.
Минатата недела изборот на нов директор на Академијата за судии и јавни обвинители беше одложен поради отстуството на претставник од Министерството за правда кој бил оневозможен да дојде од здравствени причини.
Јавниот оглас за избор на директор на Академијата беше објавен на 26 август годинава откако поранешната директорка, Наташа Габер-Дамјановска, поднесе неотповиклива оставка од функцијата кон средината на јули.