Против две лица е поднесен обвинителен предлог за кривично дело узурпација на недвижности согласно член 225 став 1 од Киривичниот законик.
Како што информира Основното јавно обвинителство – Скопје првообвинетиот е 39-годишен жител на Глумово.
Тој како трговец-поединец кој врши дејност за патнички воден транспорт, на точно неутврден датум со намера заземал во владение туѓа недвижност што е со пропис прогласена за споменик на природата. На катастарска парцела на брегот на езерото Матка поставил дрвена платформа со вкупна површина од 120 м2 со метална конструкција, над која изградил објект од цигла и дрво со површина од 49 м2.
Вториот обвинет, 25-годишник од Глумово, делото го сторил така што на пет катастарски парцели исто така на брегот на езерото, поставил дрвена платформа со метална конструкција и со површина од 189,54 м2, на која изградил времен објект со површина од 187 м2.
Градоначалникот на Скопје Петре Шилегов, кој во повеќе наврати побара да има заеднички ингеренции на Градот и опптината во вакви ситуации, најави дека во процесот на децентрализација кој се уште е отворен и натаму ќе инсистира Градот да има јурисдикција врз единиците на локална самоуправа кои административно припаѓаат во Скопје.