Основното јавно обвинителство Струга денеска до надлежниот суд достави обвинителен акт против 54-годишен жител на Струга, кој го сторил кривичното дело давање здравствени услуги без дозвола за работа од член 304-а од Законот за здравствена заштита.
Станува збор за д-р Мухамед Асани, кој воедно ја извршуваше и директорската позиција во Општата болница во Струга. Асани издавал здравствени услуги во просторија во својот дом и за тоа немал дозвола за работа.
„Како здравствен работник, доктор специјалист по гинекологија и акушерство, обвинетиот давал здравствени услуги во простор за кој немал дозвола за работа. Имено, тој во просторија во неговата семејна куќа во која живее, подготвил ординација која не била регистрирана и означена. Здравствените услуги обвинетиот ги давал од 2013 до 2020 година, со тоа што ги водел контролите на бременоста на повеќе пациентки. За извршените прегледи обвинетиот наплатувал по 1 000 денари од пациентките, а за примените средства не издавал никаков доказ“,
информираа од ОЈО-Струга.
При извршен надзор на Државниот санитарен и здравствен инспекторат при Министерството за здравство, на 16 јануари 2020 година било констатирано дека за опремената ординација докторот не поседувал дозвола за работа, по што му било врачено решение со кое му било забрането во неа да врши здравствена дејност.
Случајот во јавноста го отвори жителка на Дебар, која се пожали дека при породувањето ѝ биле отстранети матка, јајник и бубрег, а д-р Асани целата бременост ѝ ја водел токму во ординацијата за која немал дозвола за работа.
Во март оваа година, д-р Асани беше разрешен од функцијата директор на Општата болница во Струга.