Синот на независниот пратеник од Кавадарци Панчо Минов од неодамна е ангажиран во фондација што работи на проекти во парламентот, а не е вработен директно во Собранието. Станува збор за Вестминстерската фондација за демократија, која со поддршка на Британската амбасада, го помогна отворањето на Буџетската канцеларија во Собранието и ќе се грижи за нејзино функционирање.
Канцеларијата треба за пратениците да подготвува информации за буџетот, ребалансите, годишните сметки на државниот буџет, финансиските извештаи на Државниот завод за ревизија и на други независни тела основани од Собранието.
Претходно, пренесувајќи информација објавена од порталот „Република“, објавивме дека синот на пратеникот Минов од неодамна е вработен во парламентот и дека тоа се случува непосредно пред гласањето на законот за јавно обвинителство. Пратеникот рекол, како што пренесува порталот, дека неговиот син е вработен во Собранието, преку фондација.
Минов, поранешен долгогодишен градоначалник на Кавадарци, влезе во овој пратенички состав како кандидат на ГРОМ на Стевчо Јакимовски. Но, во 2018 година, набрзо по донесувањето на одлуката за пристапување кон уставни измени, согласно со Договорот од Преспа, Минов објави дека ја напушта пратеничката група на ВМРО-ДПМНЕ и дека ќе дејствува како независен пратеник.
Иако неговото заминување од таборот на ВМРО-ДПМНЕ беше поврзано со разрешувањето на актуелниот градоначалник на Кавадарци Митко Јанчев од потпретседател на ВМРО-ДПМНЕ, Минов, формално, не е дел од независната пратеничка група која во 2018 година беше дел од двотретинското мнозинство за почнување на процедурата за промена на Уставот. Сепак, тој во изминатиот период, во повеќе наврати поддржа законски решенија што беа предложени од владата на СДСМ, а во јануари 2019 година гласаше за прогласување на уставните измени, како последна фаза од овој процес на имплементација на Преспанскиот договор.
Лидерот на СДСМ Зоран Заев, во денешната изјава, навести дека е близу до двотретинско мнозинство за донесување на законот за јавно обвинителство, без учество на ВМРО-ДПМНЕ. Тој посочи и на неколку сугестии од независните пратеници што, најверојатно, ќе бидат вградени во конечниот предлог-закон. Една од нив е прислушуваните разговори да не може да бидат основа за подигање обвинение.