Европа ќе биде во Скопје, а Република Северна Македонија во Брисел со полн капацитет, пристап кон фондови, знаења, вистински принципи, рече премиерот откако најави дека во вторник ќе се одржи првата меѓувладина конференција
Откако Собранието ги изгласа заклучоците за францускиот предлог, Владата на седница попладнево го одобри предлогот на француското претседателство.
„Донесовме одлука за одобрување на предлогот на француското претседателство од 30 јуни. Со оваа одлука го почнуваме процесот на пристапни преговори на Северна Македонија со ЕУ. Со оваа владина седница заокружуваме уште еден објективно историски чекор за нашата земја“,
рече премиерот Димитар Ковачевски кој одлуката ја соопшти на прес-конференција со останатите членови на Владата.
Тој најави дека првата меѓувладина конференција ќе се одржи веќе во вторник на 19 јули во Брисел.
„Денес ја имам честа да го најавам датумот за првата меѓувладина конференција која треба да се одржи на 19 јули во Брисел. Потоа, Европа ќе биде во Скопје, а Република Северна Македонија во Брисел со полн капацитет, пристап кон фондови, знаења, вистински принципи и најважно, вредности кон кои се стремиме и ги посакуваме и сето тоа врз основа на нашата национална и државна засебноста, историја и идентитет кој ќе се гледа во сите европски центри“,
рече премиерот повикувајќи на заедништво.
Отворачката изјава на 19 јули, најави Ковачевски, ќе ја чита на македонски јазик.
Во врска, пак, со протоколот што земјава треба да го потпише со официјална Софија, премиерот најави дека шефот на дипломатијата Бујар Османи ќе ја информира Република Бугарија за денешното гласање во Собранието, како и дека добил задолжувања да се финализира протоколот, а во текот на денот и подетално ќе ја информира јавноста за целиот тој процес.
„Го задолживме денеска министерот за надворешни работи да ја информира Република Бугарија во врска со заклучоците што денеска ги донесе и изгласа Собранието и да го финализира протоколот. Во текот на денот, министерот и директно и подетално ќе ве информира во однос на целиот тој процес и граѓаните преку медиумите ќе бидат информирани и за процесот и за содржината“,
рече Ковачевски.
Според премиерот, денес имаме преговарачка рамка со ЕУ во која македонскиот јазик и идентитет се заштитени, а историските прашања се надвор од неа.
„Денес отвораме нови перспективи за државата, можности за просперитет на граѓаните. Од овде одиме напред со забрзан чекор за да се приклучиме кон европското семејство во кое многу скоро и официјално ќе се чуе нашиот македонски јазик. Изминатите денови на повеќе различни формули и со многу чинители го дискутиравме европскиот предлог. Таа широка консултација денес се заврши во Собранието каде имавме прилика да ги издискутираме и повторно да ги потврдиме нашите позиции и нашата посветеност на европскиот пат. Граѓаните имаа единствена можност да видат дека во Собранието ние говоревме за почитување и за зацврстување на минатото, за цврста и долгорочна поддршка на нашиот идентитет и национална посебност, за стабилна сегашност, но најмногу од се за подобра блиска иднина, за прогрес, за развој, за перспективна иднина базирана на здрав, вистински и модерен патриотизам“,
порача Ковачевски.
Опозицијата, пак, според него, говорела за лажен патриотизам, за квази митови, измислени апокалипси, црнила и странски сценарија.
„Свиреа, урлаа, палеа, кинеа, споредуваа наши државни пријатели со луѓе од најмрачните периоди во историјата. Сето ова тие го прават како во нивното историско и партиско минато, за свои и странски нарачки, за туѓи, а не за македонски интереси. По не знам кој пат докажаа дека за нив идентитетот се брои во пари, криминал, бели дворци и црни фотелји и автомобили“,
рече премиерот.
За нотарските изјави кои ги потпишаа пратениците на ВМРО-ДПМНЕ дека нема да гласаат за уставни измени, премиерот порача дека пратениците се независни во своето одлучување во Собранието и тие таму не ја претставуваат политичката партија или претседателот туку граѓаните. Тоа што ВМРО-ДПМНЕ, рече Ковачевски, решила да се изолира, не треба на ваков начин да ја изолира и целата држава.
„ВМРО-ДПМНЕ треба да објасни што има против внесувањето во Уставот на граѓаните на РСМ кои јасно се самоопределиле како Црногорци, Хрвати, Бугари… Сите тие се богатството на нашата држава, ние сме граѓанска држава. Ние имаме држави во блиското опкружување кои низ вклучување на граѓаните со различно самоопределување изградиле посилни општества и држави. Земете ја за пример само Хрватска. Таа има 27 делови од народи кои се дел од нивниот Устав, тие тоа го поддржале и станале членка на ЕУ и се држава која напредува по сите параметри. Не може ако некој решил себе си да се изолира, да ја изолира својата партија, преку нотарски изјави да ги изолира и своите пратеници, тоа да го прави на сите граѓани на државата и на целата држава и неа да ја изолира. Тоа е неприфатливо, тоа е ретроградно и треба да биде надминато“,
смета премиерот.