„За жал, не се намалува темпото на загрозување, на непочитување на женскиот живот. Дури си велам да не треба самите да почнеме да се заштитуваме и што е по мене во моментов можеби најнеопходно?“, изјави шефицата на државата по последните случаи на насилство врз жени во земјава, оценувајќи дека се потребни итни мерки за справување со родово базираното насилство бидејќи постојните не дале доволно резултати
Нопходно е итно преземање заеднички активности и мерки за справување со родово базираното насилство – порача претседателката Гордана Сиљановска-Давкова по последните случаи на насилство врз жени во земјава, нагласувајќи дека досегашните законски измени и институционални мерки не дале доволно резултати.

И покрај измените во Кривичниот законик, законите поврзани со Истанбулската конвенција и бројните средби меѓу институциите, невладиниот сектор и експертската јавност, вели претседателката, насилството врз жените не се намалува. Зар треба да почнеме самите да се заштитуваме – вели Сиљановска-Давкова.
„За жал, не се намалува темпото на загрозување, на непочитување на женскиот живот. Дури си велам да не треба самите да почнеме да се заштитуваме и што е по мене во моментов можеби најнеопходно?“,
изјави претседателката по дебатата во Собранието по повод 35 години од донесувањето на првиот Устав.
На новинарско прашање дали ќе побара од претседателот на Собранието на дневен ред да се стави законското решение за заштита на жените од родово базирано насилство за кое опозицијата тврди дека од август стои во фиока, претседателката рече дека проблемот бара поширок општествен и институционален пристап.
„Најнеопходно е прво да седнеме сите заедно, јас сум подготвена тоа да го организирам. Оние што ги менуваат законите, пратениците и пратеничките пред сè, невладиниот сектор, експертите, добредојдени се и малкуте жени во власта. Мислам дека под итно треба да преземеме чекори оти ова стана како епидемија“,
рече Сиљановска-Давкова.
Како неопходно таа го истакна создавањето силни мрежи за поддршка на жените во сите институции – во судството, Министерството за внатрешни работи, центрите за социјална работа, парламентот, Владата и граѓанскиот сектор. Рече дека на памет и паѓаат и бизарни идеи, како на пример, фотографиите од злоставувачките да почнат да се објавуваат во Народната канцеларија на претседателот во Скопје.
„Јас веќе не знам како да ја сензибилизираме јавноста. Таа е сензибилизирана, но проблемот е многу подлабок. Особено мислев дека по смртта на едно дете мажите ќе се освестат. Затоа и реков дека се покажа дека не се доволни само нормативните решенија. Се чини дека треба да се обидеме да преземеме активности, да ги преиспитаме, да си поставиме планови и секојдневно да бидеме активни. Јас не гледам друго решение“,
изјави претседателка.
Таа оцени дека насилството не е поврзано исклучиво со социјалниот статус, сиромаштијата или безнадежноста и оти кон него прибегнуваат и луѓе кои, како што рече, имаат исполнети животни услови.
