Обезбедена е храна и вода за македонските превозници кои останаа заглавени на италијанско-словенечката граница од страната на Италија.
Македонската амбасада со седиште во Љубљана обезбедила вода, храна, а граничните служби им дозволиле да ја премиенат границата со цел продуктите да стигнат до заглавените македонски граѓани.
Доколку е потребно, за нив ќе се обезбедат и лекови.
Во меѓувреме се бара решение за превозниците кои поради застојот на италијанско-словенечката граница останаа заглавени на граничните премини.
Освен со дописи до словенечкото и хрватското МНР, министерот за надворешни работи Никола Димитров и телефонски разговарал со неговиот словенечки колега Анже Логар со цел да се најде најбрзо решение.
Од министерството за надворешни работи претходно известија дека Димитров и Логар се договориле да вложат максимални напори за да се направи се’ што е во надлежност на министерствата за надворешни работи од регионот, како би се забрзал транспортот.
Од таму уверуваат дека прават максимални напори за да најдат решение за сите македонски патници кои се наоѓаат затекнати на граничните премини на други држави и аеродроми.
Од Министерството за надворешни работи на Словенија и Словенечкиот кризен штаб известија дека најмалку 3 000 превозници чекаат на граничните премини на италијанско-словенечката граница и уверуваат дека постојано организираат конвои, внимавајќи на правично учество на превозниците од сите држави во регионот.