Превозниците кои поради застојот на италијанско-словенечката граница останаа заглавени на граничните премини ќе добијат храна и вода, а во меѓувреме се бара решение за што поскоро да се вратат во земјава, информираат од Министерството за надворешни работи.
Освен со дописи до словенечкото и хрватското МНР, министерот за надворешни работи Никола Димитров и телефонски разговарал со неговиот словенечки колега Анже Логар со цел да се најде најбрзо решение.
„Двајцата министри се договорија дека ќе вложат максимални напори за да се направи се’ што е во надлежност на министерствата за надворешни работи од регионот, како би се забрзал транспортот. Во меѓувреме, нашата амбасада во Словенија прави напори да се обезбедат македонските превозници со вода и храна“,
велат од МНР.
Од таму уверуваат дека прават максимални напори за да најдат решение за сите македонски патници кои се наоѓаат затекнати на граничните премини на други држави и аеродроми.
Од Министерството за надворешни работи на Словенија и Словенечкиот кризен штаб известија дека најмалку 3 000 превозници чекаат на граничните премини на италијанско-словенечката граница и уверуваат дека постојано организираат конвои, внимавајќи на правично учество на превозниците од сите држави во регионот.