Како што јавува Ројтерс, се работи за 137 илјади кубни метри течен гас (ЛНГ) што Националната нафтена компанија Абу Даби треба да ѝ го испорача на Германија оваа година. Компанијата дополнително треба да испорача неодредена количина течен гас за Германија следната година
Германскиот канцелар Олаф Шолц постигна договор со Обединетите Арапски Емирати (ОАЕ), според кој, оваа земја ќе ја снабдува Германија со течен гас и дизел во 2022 и 2023 година.
За време на потпишувањето на договорот со Шолц во Абу Даби, министерот за индустрија на ОАЕ, Султан ал-Џабер, го поздрави новиот, како што кажа, историски договор кој го зајакнува растечкото енергетско партнерство меѓу ОАЕ и Германија. Шолц, кој се состана со претседателот на ОАЕ, Мохамед бин Зајед Ал-Нахјан, исто така присутен на потпишувањето, го поздрави договорот за енергетска безбедност.
фото: EPA-EFE/ABDULLA AL NEYADI
„Треба да бидеме сигурни дека производството на течниот гас (ЛНГ) во светот е напреднато до точка каде што големата побарувачка што постои може да се исполни без да се прибегне кон производствениот капацитет што постои во Русија“,
изјави Шолц пред новинарите пред објавувањето на договорот, јавува Ројтерс.
Според договорот, се предвидува ОАЕ да испорачува течен природен гас во Германија на крајот на 2022 година, по што ќе следи испорака на дополнителни количини во 2023 година.
Како што јавува Ројтерс, се работи за 137 илјади кубни метри течен гас (ЛНГ) што Националната нафтена компанија Абу Даби треба да ѝ го испорача на Германија оваа година. Компанијата дополнително треба да испорача неодредена количина течен гас за Германија следната година.
„Ова претставува важна пресвртница во изградбата на инфраструктура за снабдување со течен гас во Германија и воспоставување на поразновидно снабдување со гас“,
се вели во соопштението на германската енергетска компанија РВЕ (RWE).
Германските власти се надеваат дека ова ќе помогне да се оттргнат од вртоглавото зголемување на цените на енергијата.
Тамошните медиуми објавија дека во септември имало директна испорака на дизел во Берлин и додаваат дека во 2023 година Германија ќе добива околу 250 000 тони дизел месечно.