Тој изрази задоволство што е во посета на земјава вторпат за два месеца и што ќе има можност да разговара за оваа важна иницијатива која треба да ја забрза евроинтеграцијата на земјава и регионот
САД секогаш стојат зад Северна Македонија и ја поддржуваат. Навистина сме горди што сме сојузници и што работиме со оваа влада која во нејзините последни денови е домаќин на оваа важна иницијатива. Планот за раст на ЕУ не е како никој друг план досега бидејќи не треба да правите реформи за да бидете оценувани подоцна, туку тие ќе овозможат побрз пристап до заедничкиот европски пазар. Секоја влада од шесте земји од Западен Балкан се согласи дека ќе работи заедно за луѓето од регионот да добијат вистински можности и поскоро да станат дел од Европската Унија. Ова денеска пред пред почетокот на лидерскиот состанок за Планот за раст на ЕУ во Скопје го рече Џејмс О’Брајaн, помошник-државниот секретар за европски и евроазиски прашања на САД.
„Ако направите одредени реформи тогаш вашите компании и вашите луѓе многу брзо ќе ги уживаат четирите слободи на ЕУ – слобода на движење и можност да работите каде сакате, слободно движење на капиталот и услугите. Тоа е суштината на заедничкиот пазар, затоа сум задоволен што сум тука со Јан Копман кој ја дизајнира оваа програма“,
вели О’ Брајан.
Тој изрази задоволство што е во посета на земјава втор пат за два месеца и што ќе има можност да разговара за оваа важна иницијатива која треба да ја забрза евроинтеграцијата на земјава и регионот.
„Имаме претставници од шесте земји на Западен Балкан. Денеска ќе работиме на две прашања, како практични идеи кои ќе им овозможат на луѓето слобода да ги развиваат нивните економии и практики кои треба да ги следиме. Овој регион има многу иницијативи, а тоа што е важно е што ќе биде реализирано помеѓу состаноците и ние имаме план за тоа. Она што сакаме да го видиме е луѓето да добијат повеќе можности, за сите политички проблеми низ регионот секоја влада се согласи дека сите шест земји ќе мора да работат заедно за луѓето од регионот да добијат вистински можности и поскоро да станат дел од ЕУ. Денеска е добар момент и ќе се обидеме да постигнеме напредок“,
рече О’ Брајан.
Состанокот на лидерите на земјите од Западен Балкан посветен на Планот за раст на Европската Унија за регионот, кој ќе биде заокружен со усвојување на заедничка декларација.
Во неа, како што изјави премиерот Димитар Ковачевски, ќе бидат истакнати заложбите за спроведување на активностите од Планот.
На состанокот присуствуваат и српскиот претседател Александар Вучиќ, премиерите на Албанија, Еди Рама, на Црна Гора, Милојко Спаиќ, на Косово, Албин Курти, актуелниот министер за финансии и трезор во Советот на министри на Босна и Херцеговина, Срѓан Амиџиќ, како и Герт Јан Копман, генерален директор за соседство и преговори за проширување во Европската комисија.