Во американските сојузни држави и градовите каде овие денови се шири заразата со коронавирусот, меѓу заразените има се поголем број млади.
Како што објави весникот „Њујорк тајмс“, младите луѓе сочинуваат речиси половина од новозаразените во Аризона, а мнозинство во градските центри во Тексас, додека, пак, на Флорида просечната старосна граница на новозаболените се намали на 35 години. Во споредба со март, возрасната граница изнесувала 65 години.
Таквата промена претставува причина за загриженост кај градоначалниците, гувернерите на државите и здравствените власти, кои веќе размислуваат за есен, кога ваквиот развој на настаните би можел да ги наруши плановите за повторно отворање на училиштата и универзитетите, одржување на спортски настани, како и враќање на нормалниот живот и економските активности во целосен капацитет.
Постои опасност инфицираните меѓу младата популација, а посебно оние без симптоми, да ја пренесат заразата на ранливите групи Американци во ситуација кога се бележи огромен пораст на бројот на заразени случаи во јужниот и западниот дел на САД, наведува „Њујорк тајмс“.