Доколку ВМРО-ДПМНЕ одлучи да не ја поддржи техничката влада предводена од Талат Џафери, тогаш НСДП нема да даде поддршка за министрите и заменицик-министрите предложени од ВМРО-ДПМНЕ, е една од одлуките донесена на седница на Централниот одбор на партијата
Нова социјалдемократска партија (НСДП) донесе политичка одлука за учество на партијата во европската коалиција предводена од СДСМ, информираат од партијата.
„Централниот одбор на НСДП едногласно му дава поддршка на лидерот на владејачката коалиција Димитар Ковачевски за продолжување на активностите за окрупнување на европската коалиција со сите европски ориентирани сили во општеството. Нашата коалиција треба да ги обедини сите прогресивни сили во државата кои бараат продолжување на процесот на преговори со Европската Унија сè до полноправно членство, затоа што тоа е вистинскиот пат за прогрес, стандарди и сигурна иднина на граѓаните, на што НСДП укажува подолго време наназад“,
се наведува во соопштението од партијата по одржаната седница на Централниот одбор.
Европската коалиција, додаваат од НСДП, гарантира победа на претстојните парламентарни и претседателски избори и е браник против регресивните и мрачни сили предводени од ВМРО-ДПМНЕ и Христијан Мицкоски, кои немаат визија за иднината и сакаат хаос, безредие и изолација на државата.
Од НСДП велат дека донеле одлука пратениците да го поддржат изборот на Јован Митревски за нов претседател на Собранието, изборот на Талат Џафери за премиер и да го поддржат изборот на техничката влада.
„Доколку ВМРО-ДПМНЕ одлучи да не ја поддржи техничката влада предводена од Талат Џафери, тогаш НСДП нема да даде поддршка за министрите и заменик-министрите предложени од ВМРО-ДПМНЕ“,
се додава во соопштението од НСДП.
Од НСДП велат дека на седницата на Централниот одбор е избран и Централен изборен штаб за претседателските и парламентарните избори со кој ќе раководи генералниот секретар на партијата Мики Милковски.
Досегашниот заменик-министер за економија од НСДП, воедно и потпретседател на партијата, Зоран Маневски, е утврден како предлог за заменик-министер за економија и во техничката влада.
Покрај овие одлуки, на седницата на Централниот одбор, додаваат од партијата извештај за работењето поднеле избраните и именувани лица од НСДП во централната и локалната власт.