„На крајот на овој европски пат е големата награда, членството во Европската Унија. Пат и цел кои ќе ни овозможат врвна демократија, социјална правда, функционално владеење на правото“, вели премиерот во обраќањето
Премиерот Димитар Ковачевски во новогодишната честитка до граѓаните истакнува дека во овој момент, најмногу е потребна верба, оптимизам и мудрост.
„Оставаме зад нас уште една година. Година која не беше воопшто лесна. Но сепак, треба да сме горди на постигнатото. Во рамки на можностите направивме многу. Во најтешката криза работевме напорно, посветено и фокусирано. Работевме да го направиме животот подобар. За да сите имаат повеќе. И најважно од сè, никој не беше оставен сам“,
вели Ковачевски во видеообраќањето.
Според премиерот, платите и пензиите пораснаа на историски високо ниво.
„Денес имаме речиси 50 отсто покачени пензии, имаме двојно повисока минимална плата, и просечна плата која е веќе над 600 евра. Ве уверувам, и платите, и пензиите, ќе продолжат да растат и следната година! Со антикризните мерки, го заштитивме и помогнавме животниот стандард на семејствата и на фирмите. И пензионерите, и студентите, и учениците, и самохраните родители, и најранливите можеа да се потпрат на нас“,
нагласува тој.
Ковачевски посочува дека „имаме двојно повеќе странски инвестиции, намалена невработеност и зголемена вработеност“, а по првпат и авансни исплати за земјоделците.
„Продолживме да ја трансформираме земјата во зелен енергетски центар на Европа. Заеднички постигнавме многу, затоа што напорно работевме. Рамноправно, еднакво и солидарно! И така и ќе продолжиме и понатаму. Има пред нас простор да направиме и уште повеќе, да биде уште подобро, платите и пензиите да продолжат да растат, а на најранливите директно и солидарно да им помогнеме. Затоа што тоа се вистинските и македонски и европски вредности. И затоа во овој момент, најмногу е потребна верба, оптимизам и мудрост“,
вели Ковачевски во новогодишната честитка.
Понатаму потенцира дека треба со целото знаење со кое располагаме да ги постигнеме целите кои се пред нас.
„Често велам дека нашата предност, наша најголема вредност и најсилна страна се луѓето, нашите граѓани. Затоа што имаме капацитет, имаме знаење, имаме волја да ги направиме следните чекори. Да продолжиме и понатаму да го подобруваме животот на граѓаните. Да го направиме и она што е најважно – да ги задржиме младите дома. Да ги вратиме тие што заминале, затоа што европскиот пат на кој сме тргнати е започнат, и не застанува. Мора да гледаме напред, мора да се движиме напред. Токму европскиот пат ќе донесе развој и подобро утре“,
истакнува премиерот.
Ковачевски дополнува дека е сигурен оти ќе има подобро утре.
„Оптимизмот кој го споделувам со вас е изграден на реални основи, затоа што знам дека сѐ што треба, заеднички ќе го направиме. Оваа држава има луѓе кои имаат и храброст и енергија длабоко во себе, кои ќе го изодат тој пат и кои ќе остават подобра земја за своите деца, за сегашните и за идните генерации. На крајот на овој европски пат е големата награда, членството во Европската Унија. Пат и цел кои ќе ни овозможат врвна демократија, социјална правда, функционално владеење на правото. Јас верувам во тоа и во тој дух, и со позитивна мисла, вам и на вашите семејства ви ги честитам новогодишните и Божиќните празници! Искрено, од срце, ви посакувам добро здравје, среќа, радост и спокој“,
вели тој во новогодишното обраќање.
Премиерот на крајот во честитката изразува благодарност до сите кои во овие празнични мигови се на работните места и се грижат за нашето здравје и безбедност.