Пофлексибилниот пристап на Софија кон Скопје има поддршка од 31 отсто од бугарските граѓани, само два месеци по изборот на новата влада на Кирил Петков, според најновото истражување на „Алфа рисрч“. Сепак, и натаму преовладуваат приврзаниците на тврдиот став во дијалогот
Бугарското општество е поделено по однос на темата за С Македонија. Новиот пристап на Софија кон Скопје има поддршка од 31 отсто од бугарските граѓани, само два месеца по изборот на новата влада на Кирил Петков, според најновото истражување на „Алфа рисрч“. Сепак, и натаму преовладуваат приврзаниците на тврдиот став во дијалогот со С Македонија.
Иако поддршката за досегашниот став на Софија кон Скопје овој пат е значително намалена во споредба со претходните истражувања на јавното мислење (посебно во споредба со периодот на владеење на ГЕРБ на Бојко Борисов кога стигнуваше и до 80 отсто), таа и сега е за 18 процентни поени повисока од наклонетоста кон пофлексибилниот став што го промовираат новите бугарски власти.
„За најавениот нов, пофлексибилен пристап во преговорите со нашиот сосед се 31 отсто, но за придржување до досегашниот поцврст став се 49 отсто. По ова прашање, тенките црвени линии не минуваат само меѓу коалициските партнери, туку и кај нивните поддржувачи. Со исклучок на Демократска Бугарија, поддржувачите на сите партии во владејачката коалиција, вклучително и оние на Промената продолжува, му даваат предност на досегашниот пристап“,
се наведува во истражувањето на „Алфа рисрч“.
Според агенцијата, тоа не значи дека новиот пристап е осуден на неуспех, но ја потврдува старата максима „не е доволно да се каже, важно е да се убеди“.
„И очигледно, токму во убедувањето и убедливоста за теми кои не се директно поврзани со противењето на претходните власти, новата влада трпи значителен дефицит. Градењето обединети позиции за двете главни надворешнополитички прашања во моментот, како и добивањето поддршка за владиното дејствување, бара изразување на јасни аргументи, засновани на длабински анализи и разбирање на процесите, поткрепени со убедливо политичко лидерство. Развојот на овие теми, исто така, ќе одреди каде ќе се развиваат ставовите на јавноста“,
се наведува во големото истражување на „Алфа рисрч“ за ставовите на бугарското општество.
Анкетата е спроведена од 6 до 14 февруари годинава, на примерок од 1 060 испитаници. Со неа се опфатени и прашања од внатрешната политика на Бугарија, а се мери и рејтингот на носителите на политиките.
