Синдикатот очекува дека ќе се исполни договореното за покачување на платите – по 3 000 денари за медицинските сестри и по 2 000 за сите останати
Новиот министер за здравство Фатмир Меџити, од редовите на Алијанса за Албанците, за утре попладне ги повикал на средба претставниците на Синдикатот на Клиничкиот центар.
Од Синдикатот ќе се појават на средбата и очекуваат дека со новиот министер ќе го финализираат тоа што веќе е договорено – покачување на платите.
„Се надеваме дека ќе наидеме на разбирање за да се потпише во најбрз можен рок договорот што го имавме со претходниот министер и со Фондот. Тие средства веќе се обезбедени, анексите се направени и коефициентите се средени, така што би требало да ја завршиме работата“,
појасни за МИА потпретседателот на Синдикатот, Предраг Серафимовски.
Бидејќи е прва средба, тој рече дека ќе инсистираат како Синдикат на Клинички, но и за цело јавно здравство. Во изјавата потсетува на протестот на здравствените работници и она што било договорено.
„Сите излегоа на протест и од другиот синдикат од ССМ. Инсистираме на потпишување за зголемување на плати – за медицинските сестри 3 000 денари бруто, а за сите останати, значи јавна администрација, помош на технички персонал и доктори, по 2 000 денари. Таков е договорот“,
додаде Серафимовски.
Со барање за покачување на платите и усогласување со промените на минималната плата, синдикатите минатиот месец организираа протести на вработените во јавното здравство пред Клиничкиот центар „Мајка Тереза“ и Градската општа болница „8 Септември“ во Скопје, како и во други градови низ државата.