Да се почитува оваа централна одредба од договорот од Преспа, да се користи само името Северна Македонија во и надвор од државата, кога се споменува нашиот северен сосед. Во спротивно, сигурно е дека ќе создадат проблеми не само во односите на Грција со Северна Македонија, туку и во односите на Европа со Северна Македонија – предупредува Мицотакис вели грчкиот премиер
Никаков напредок на долгиот пат на Скопје кон Европа не може да се постигне без апсолутно почитување на Договорот од Преспа за прашањето за името, вели грчкиот премиер Кирјакос Мицотакис во интервју за државната телевизија ЕРТ. Тој посочува дека во основата на договорот од Преспа е концептот на именување, односно името Северна Македонија да се употребува „ерга омнес“ и да важи за сите, односно да се користи и внатре и надвор од државата.
Мицотакис, како што вели во интервјуто, испраќа предупредувачка порака до идната влада во Скопје – без целосно усогласување со Договорот во однос на името, Грција нема да ги ратификува меморандумите и нема да има напредок во ЕУ-перспективата на земјава.
Тој рече дека ќе ги чекаат официјалните ставови на новата влада, но потенцира дека првите примери на однесување се исклучително негативни.
„Сакам да потсетам дека не гласавме за Договорот од Преспа, бидејќи изразивме силна резерва за тоа што со овој договор се признава македонската нација и македонскиот јазик. Тоа беше главната причина што не гласавме за договорот. Но, по прашањето за името има многу јасно повлекување и сакам уште еднаш да упатам предупредувачка порака до новата влада, отсега да ја смени линијата. Да се почитува оваа централна одредба од Договорот од Преспа, да се користи само името Северна Македонија во и надвор од државата, кога се споменува нашиот северен сосед. Во спротивно, сигурно е дека ќе создадат проблеми не само во односите на Грција со Северна Македонија, туку и во односите на Европа со Северна Македонија“,
рече Мицотакис.
Фото: Принтскрин
Мицотакис во интервјуто се осврна и на инаугурацијата на новата претседателка на државата Гордана Силјановска-Давкова, која во заклетвата и во говорот потоа не го употреби името Северна Македонија.
„Јас лично интервенирав да го информирам раководството на Европската Унија за изјавите на претседателот на Северна Македонија. Осуди имаше и од претседателот на Комисијата и од претседателот на Советот и од САД. Така, верувам дека ќе се изврши севкупен притисок врз раководството на Северна Македонија да не направи значително повлекување“,
порача Мицотакис.
Мицотакис во неколку наврати предупреди дека ќе се влошат односите меѓу двете земји, како и дека нема да има напредок во евроинтеграциите за Северна Македонија, ако не се почитува договорот од Преспа.
Реакциите од грчка страна се интензивираа по инаугурацијата на претседателката Гордана Силјановска-Давкова, како и по изјавата на лидерот на ВМРО-ДПМНЕ, Христијан Мицкоски, кој порача дека ќе го применува истиот пристап.