Рестрикциите стапуваат на сила од утре и предвидуваат затворање на угостителските објекти и продавници кои не се неопходни, затворање на школите и забрана за излегување освен за набавка на намирници
Нов Зеланд повторно воведе рестрикции во делови од земјата, откако се регистрирани нови случаи на коронавирус. Ова се први случаи на зараза по 102 дена на ниту еден регистриран случај на локална трансмисија во земјата.
Премиерката на Нов Зеланд, Џасинда Ардерн, денеска потврди дека се регистрирани четири нови случаи на локална трансмисија на коронавирус и најави дека во најнаселениот град на Нов Зеланд, Оукланд, од утре напладне привремено ќе се воведат ограничувања од трет степен кои ќе бидат на сила најмалку до петок
Сите четири случаи се членови на едно семејство во Јужен Оукланд и ниту еден од нив не патувал надвор од земјата.
Рестрикциите, според здравствените власти, треба да им дадат време да ја откријат трагата на заразата и да ја проценат ситуацијата.
Ограничувања од трет степен предвидуваат затворање на ресторани, барови и продавници што не се од суштинско значење, а граѓаните ќе можат да ги напуштат своите домови смо за набавка на намирници. Собирите се ограничуваат на до 10 лица, а училиштата остануваат затворени најмалку три дена.
Во останатите делови од Нов Зеланд се воведуваат ограничувања кои не дозволуваат собири на повеќе од 100 лица, со задолжително физичко растојание во угостителските објекти, музеите, библиотеките и базените.