Не се дозволи да се повредат националната гордост и чувствата на македонскиот народ, не беа дозволени никакви други политички валканици коишто претходните денови беа најавувани, рече Николовски од СДСМ
Граѓаните и државата вчера не дозволија да се погази придонесот и значењето на Гоце Делчев, изјави денеска Дарио Николовски, член на ЦО на СДСМ, одговарајќи на новинарско прашање.
„Граѓаните и државата вчера не дозволија да се погази придонесот и значењето на Гоце Делчев. Не се дозволи да се повредат националната гордост и чувствата на македонскиот народ, не беа дозволени никакви други политички валканици коишто претходните денови беа најавувани, како што и впрочем денеска тоа го прави Ковачки на неговата прес-конференција“,
рече Николовски.
Претходно денеска, во соопштение за медиуми, СДСМ истакна дека институциите на системот и покрај сите предизвици, обезбедија достоинствено и гордо да се оддаде почит на ликот и делото на револуционерот Гоце Делчев.
Пратеникот Драган Ковачки од ВМРО-ДПМНЕ денеска на прес-конференција реагираше дека во одбележувањето на раѓањето на Гоце Делчев се видела неспособноста на власта на Ковачевски и Ахмети.
Владата на Ковачевски, рече Ковачки, како никогаш порано во историјата, им забрани на сопствените граѓани во масовен број да дојдат пред неговото вечно почивалиште и е свесна дека во Македонија живеат национално освестени граѓани, кои не подлегнуваат на и не ги прифаќаат понижувањата приредени од истата таа Влада.