Заев го тужи Николоски поради изјава во која Николоски вели дека Заев е на врвот на пирамида што изрекетирала над 20 милиони евра
Јас ќе се бранам сам затоа што веројатно онаму каде што е вистината нема потреба од адвокати. Се надевам дека во овој судски процес ќе ја докажам вистинитоста на мојата изјава, изјави денеска Александар Николоски, пратеник и потпретседател на ВМРО-ДПМНЕ, во врска со судскиот процес што против него се води за клевета, а во кој е тужен од премиерот Зоран Заев.
Николоски имаше забелешка што Заев не се појавил на денешното рочиштето за предметот што пред Граѓанскиот суд се води за неговата изјава од август 2019 во врска со случајот „Рекет“, дека е тоа добро организирана операција и дека на врвот на таа пирамида стојат Зоран Заев и СДСМ
Тој рече дека овој случај не морало да заврши на суд бидејќи иста ваква изјава дал и две-три недели пред изјавата за која е тужен.
„Ова е невидено, го нема никоја земја членка на Европската Унија. За да е апсурдот поголем, ме тужи за работи коишто се јавно познати и коишто доколку не се согласува може да пушти еден едноставен демант“,
вели Николоски додавајќи дека изјавата на ниеден начин не била демантирана ниту од Заев ниту од СДСМ како политичка партија
Во реакцијата од СДСМ на оваа изјава, се наведува дека Николоски и покрај тоа што е осуден за клевета, не се откажува од ширење лажни вести и конструирање неспостоечки случаи, во очајни обиди да ја манипулира јавноста.
Заев го тужи Николоски поради изјава во која тој вели дека Заев е на врвот на пирамида што изрекетирала над 20 милиони евра.
За тужбата Николоски зборуваше и на прес-конференција во декември лани, кога соопшти дека му бараат отштета од 60 000 денари и рече дека не планира да му се извини на премиерот за тоа што го кажал.
Во изјавата, поради која премиерот поднел тужба, Николоски вели:
„Некаде пред две недели споменав дека вкупната сума на побарани изрекетирани средства надминува 20 милиони евра. Досега никој ова не го демантираше, што значи дека е рекетиран повеќе од еден бизнисмен, рекетирани се многу бизнисмени и побарани се многу пари. Тоа е операција која не можат да ја завршат еден или двајца луѓе. Тоа е операција која е добро осмислена од врвот на СДСМ, координирана лично од Зоран Заев и понатака управувана од целата држава, затоа е потребна и кривична и политичка одговорност“.