На новинарска забелешка дека ВМРО-ДПМНЕ уште од 2020 година ја форсира тезата дека владата ќе го има најкраткиот мандат и веднаш ќе падне, но без успех, Николоски одговори дека успеале да го променат раководството на СДСМ по ланските локални избори
Потпретседателот на ВМРО-ДПМНЕ, Александар Николоски, вели дека барањето за превремени парламентарни избори најдоцна до пролет, кое вчера го реактуелизираше Централниот комитет на партијата, доаѓа главно поради, како што рече, спорниот легитимитет на владата. Во гостувањето во емисијата „360 степени“ на ТВ Алсат, Николоски рече дека поважно од композицијата на владата е неисполнувањето на двете главни ветувања – подобрување на животниот стандард на граѓаните и борбата со организираниот криминал и корупција.
„Во двата сектори има сериозно уназадување. Тоа го чувствуваат граѓаните на своја кожа и тоа е основната причина зошто се потребни брзи превремени парламентарни избори. Зошто велиме брзи? Затоа што економската и енергетската криза се толку силни и толку не знаат да се снајдат, што не смее да се губи време. Факт е дека оваа зима е изгубена, но, исто така, луѓе што малку разбираат знаат дека следната зима ќе биде полоша и од оваа зашто нема брзо да завршат воените дејствија во Украина“,
рече Николоски, додавајќи дека очекувањата се оти цените на енергенсите следната година дополнително ќе одат нагоре.
Според него, изборите мора да се случат најдоцна на пролет за новата влада да има време да се подготви за идната зима.
На новинарска забелешка дека ВМРО-ДПМНЕ уште од 2020 година ја форсира тезата дека владата ќе го има најкраткиот мандат и веднаш ќе падне, но без успех, Николоски одговори дека успеале да го променат раководството на СДСМ по ланските локални избори.
„Целата прва постава на СДСМ се повлече и неслучајно СДСМ има ново раководство. Точно е дека тоа беше влада со најкраток мандат. Оваа влада сега, исто така, треба да се соочи со реалноста, а тоа е дека има сериозен проблем со сопствената поддршка и кредибилитет. Тоа не го говорат само релевантните истражувања на јавното мислење, тоа го говорат и граѓаните. И, всушност, најдобар доказ дека го знаат тоа и дека се плашат од истото е што бегаат од предвремени избори“,
рече Николоски.
Според него, прашањето за предвремени избори е суштествено бидејќи не смее да се дозволи сѐ што било градено во изминатите 30 години и во поранешна Југославија вторпат да биде уништено.
„Зошто велам вторпат? Затоа што еднаш колабираше во 90-ите години со транзицијата и со лошо спроведената приватизација, кога преку 300 илјади луѓе изгубија работа и Македонија сѐ уште не може целосно да се опорави од тие случувања. Вторпат доколку дојде до целосно уништување на она што се изгради сега како стопанство, а многу е возможно, уште 30 години ќе ѝ требаат на Македонија да дојде до точка ‘нула‘. Треба да сме паметни, да не дозволиме вторпат да се случи тоа“,
рече Николоски.
На прашањето „дали тоа што ВМРО-ДПМНЕ постојано зборува за предвремени избори, а тие не се случуваат, ги демотивира поддржувачите на партијата“, Николоски одговори:
„Напротив, мислам дека ги мотивира. Покажа резултатот на локалните избори, но најважно, ќе покажат следните парламентарни избори.“
На новинарска забелешка дека за да има парламентарни избори напролет, на пример, околу 15 април, од Нова година треба да има техничка влада (најмалку сто дена пред гласањето), потпретседателот на ВМРО-ДПМНЕ рече дека има доволно време за да се заврши целата процедура до крајот на годината.
Централниот комитет на партијата од вчерашната седница која се одржа во Прилеп излезе со барање за превремени парламентарни избори најдоцна до пролет и прифаќање на барањата на ВМРО-ДПМНЕ за економско заздравување. Централниот комитет на ВМРО-ДПМНЕ ѝ даде поддршка на пратеничката група да не гласа за уставни измени. Што се однесува до економските мерки, оваа партија настојува во буџетот за следната година да вклучи: одложување на прогресивниот данок кој треба да почне од јануари, спречување на поскапување на струјата, викенди без ДДВ, поддршка за локалните компании преку намалување на акцизите на горивата и слично.