Николоски истакна дека не познава ниту една друга опозициска партија која нуди помош за граѓаните, а владата тоа го одбива потенцирајќи дека единствено одговор зошто одбива помош е всушност да може да прави криминал и корупција
Потпретседателот на ВМРО-ДПМНЕ Александар Николоски во вечерашното гостување во емисијата „Само вистина“ на ТВ Канал 5 посочи дека владата ја одбила помошта на ВМРО-ДПМНЕ за набавка на гас по фиксна цена од 850 евра за 1 000 кубни метри за цела 2023 година, а набавувала дупло поскап гас односно, 1 950 евра за 1 000 кубни метри, изразувајќи сомнеж дека од први јануари граѓаните на Скопје ќе имаат гас за греење.
„Не можам да прифатам да се обидува некој да помогне, а на таа помош не се возвраќа. Еве пред мене имам колку набавувал ТЕ ТО како компанија и по која цена набавувал БЕГ кога го грееше Скопје, конкретно се однесува на оваа 2022 година. Просечна цена по која што е набавувано гас е 1 569 евра за 1 000 кубни метри, а владата набавуваше и по 1 950 евра за 1 000 кубни метри. Од контактот кој што го обезбеди ВМРО-ДПМНЕ, владата доби понуда за фиксна цена за цела 2023 година од 850 евра за 1 000 кубни метри. Значи внимавајте од едната страна зборуваме за 850 евра, а друга страна зборува за 1 950 евра што кога ќе се помножи со количината е заштеда од стотици милиони евра. И оваа понуда не е прифатена од владата, ги играа луѓето, дојдете вторник, четврток дадете ваква понуда, дајте онаква понуда за да можат да си ги тераат личните бизниси. И еве сега слушаме шпекулации во јавноста дека има две бугарски, а една турска фирма кои што ќе се ангажираат за набавка на гас“,
рече Николоски.
Николоски истакна дека не познава ниту една друга опозициска партија која нуди помош за граѓаните, а владата тоа го одбива потенцирајќи дека единствено одговор зошто одбива помош е всушност да може да прави криминал и корупција.
„Не знам друга опозиција која што сака да и помогне на власта, не знам друга опозиција која што се труди да има поевтина електрична енергија, не заради власта, туку заради граѓаните и власта тоа да го одбива. Единствен одговор е криминал и корупција“,
изјави Николоски.