Потпретседателот на опозициската партија зборувал и за поткуп и притисоци врз гласачи, како и за антивладините протести, но во партиското соопштение нема информација дали ги спомнал и внатрепартските превирања по изборниот пораз
Потпретседателот на ВМРО-ДПМНЕ, Александар Николоски и новиот меѓународен секретар на партијата Влатко Ѓорчев учествуваат денеска на политичко собрание на Европската народна партија (ЕПП).
Со собранието претседава претседателот на ЕПП, Доналд Туск, а поради корона-кризата настанот се одржува преку конференциска врска.
Николоски, како што соопштија од ВМРО-ДПМНЕ, имал свое обраќање на политичкото собрание, при што ги информирал партиите членки на ЕПП за недемократската атмосфера во која, според него, поминале изборите во земјава на 15 јули, за поткуп на гласачи, директен и институционален притисокот врз гласачи. Тој се пожалил и на нееднаков пристап за промоција на програмата и кандидатите на ВМРО-ДПМНЕ, поради, како што рекол, злоупотребата на вонредната состојба од страна на СДСМ.
Во партиското соопштение нема информација дали потпретседателот на ВМРО-ДПМНЕ ги спомнал пред ЕПП и внатрепартските превирања по изборниот пораз.
Николоски информирал за активностите што ги има партијата, како и за протестите што ги организира, но и за, како што се посочува во партиското соопштение, корупциските скандали што ја следат владата на Заев.
На политичкото собрание се зборува за состојба во Медитеранот, судирот во Нагорно Карабах, корона-кризата, како и извештаите на ЕПП и следните активности.