Очигледно е дека Мицкоски без срам ги лажеше и нашите сопартијци на кои им велеше дека главниот интерес е да ги заштити нив од прогон, реагираат независните пратеници кои беа исклучени од ВМРО-ДПМНЕ
Независната пратеничка група остро реагира по денешното објавување на нови аудиоснимките од сетот „бомби“ од разговори меѓу лидерот на ВМРО-ДПМНЕ, Христијан Мицкоски, и Зоран Милески-Кичеец, кој призна вина и е осуден за „Рекет“.
Од Независната пратеничка група, која произлезе од ВМРО-ДПМНЕ, а чии членови гласаа за новиот Закон за јавното обвинителство велат дека не очекувале дека Мицкоски ќе отиде толку далеку што ќе кочи донесување реформски закони во функција на заштита на криминал и на финансиски интереси.
„Иако одамна сме разочарани од тоа што ѝ се случува на нашата партија, сепак, не очекувавме дека Мицкоски може да оди дотаму, да кочи закони за да штити криминал, со цел, финансиски бенефит. Мицкоски не обвинуваше нас дека сме земале пари да гласаме, а тој се слуша дека само гледа личен интерес. Јавноста сега се увери дека ние одбивме да постапиме спротивно на интересите на нашата држава и нашиот народ, како што тоа го правеа други наши колеги по нарачка од Мицкоски“,
се наведува во реакцијата на независните пратеници.
Тие посочуваат дека како што изминува времето сѐ појасно е кој се борел за правда и правна држава, а кој штител криминал.
„Разговорите кои јавно се објавуваат меѓу Мицкоски и Милески покажуваат кој гласал во Собрание по сопствено убедување, а кој бил платен и имал лична корист за да го прави тоа. Сега ни е јасно зошто Мицкоски ни ветуваше: ‘Со мене ќе ви биде подобро’, а всушност, причината била предметот „Империја“. Очигледно е дека без срам, Мицкоски ги лажеше и нашите сопартијци на кои им велеше дека главниот интерес е да ги заштити нив од прогон. Дволичноста и лицемерието на Христијан Мицкоски сега ги слушна и јавноста. Нели е срамно Мицкоски по митинзи да се фали дека ќе ја врати правдата, која всушност тој сакал да ја продаде за да му плаќаат долгови и автобуси“,
велат од независната ПГ алудирајќи на една од претходните снимки во која се зборува за тоа дека Сашо Мијалков давал донации за автобуси при организацијата на минатогодишните протести на опозицијата во Скопје.
Пратениците што беа исклучени од ВМРО-ДПМНЕ посочуваат дека нивна заложба било предметите на СЈО да добијат судски епилог и да се знае кој е виновен, а кој обвинет без докази.
„Успеавме во тоа и покрај сите притисоци, но и закани кои ги добивавме во тој период и се присутни и денес, а доаѓаа од мала група луѓе, по нарачка на ним познати лица. Носењето на Законот за јавно обвинителство беше нотирано како значаен успех по европскиот пат на нашата татковина. Со него се елиминираат политичките влијанија, какви што гледаме дека ги имало во минатото. Ние, ја обезбедивме правната држава која Мицкоски сакаше да ја урниса. Притисоците кои Мицкоски ги правел врз некои од колегите пратеници и за други закони кои биле во собраниска процедура ќе излезат на виделина, бидејќи на лагата ѝ се кратки нозете. ВМРО-ДПМНЕ секогаш имало сила и луѓе со визија, за да ја променат партијата на подобро. Тоа ќе го кажат и тие околу Мицкоски на 15 јули, кога очигледно е дека тој ќе доживее дебакл“
велат независните пратеници.
Во денешните објавени снимки на Јутјуб, Мицкоски му се жали на Кичеец дека додека тој се бори да не поминат СЈО и „Империја“, Сашо Мијалков го плука и му пишува писма.
Во предметот „Империја“ што го отвори СЈО, првоосомничен е бизнисменот Орце Камчев, кој потоа го пријави случајот „Рекет“, кој, практично, го урна Специјалното обвинителство поради инволвираноста на Катица Јанева.