Се најавува можност професионалните војници да се ангажираат во системот за управување со кризи како обезбедување на критичната инфраструктура, со можност за пензионирање со условите за активен воен персонал, како и зголемување на границата за курс за подофицери до 45 година
На вчерашната средба со министерката за одбрана Славјанка Петровска позитивно е утврден текстот за предлог-законот, а тоа е резултат на добриот социјален дијалог со министерката и со Министерството за одбрана чија цел е изнаоѓање решенија за сите отворени прашања кои ги засегаат професионалните војници и сите припадници на Армијата.
Ова денеска го соопштија од Независниот синдикат на професионални војници СО Скопје, наведувајќи дека биле прифатени поголем дел од решенијата со кои се решаваат проблемите наталожени со години и тие значат подобрување на условите за работа и пензионирање на припадниците.
„Професионалните војници добија надоместок за станарина уште од првиот договор за вработување, а не како досега после 4-та година од вработувањето, како и пензионирање по поповолните услови без оглед во кој орган ќе бидат преземени. Беше договорена исплата на 100 проценти од висината на основната плата за боледување на активниот воен персонал“,
се појаснува во соопштението од претседател на НСПВ СО Скопје, Александар Насковски.
Најавено е и отворање нова можност за ангажирање на професионалните војници во системот за управување со кризи и како обезбедување на критичната инфраструктура, со можност за пензионирање со условите за активен воен персонал, како и зголемување на границата за курс за подофицери до 45 година.
„Прифатено е и барањето на синдикатите отпремнината за професионалните војници да важи и за ПФВ кои не се преземени односно останале во МО. Ние како Независен синдикат на професионални војници СО Скопје (НСПВ СО Скопје) го поздравуваме ваквиот начин на соработка и решавање на проблемите, со цел подобрување на правата на припадниците на Армијата“,
пишува во соопштението.