Премиерот Зоран Заев не смее да биде и привремен раководител на Министерството за финансии, бидејќи тоа е спротивно на Законот за спречување на корупцијата и судирот на интереси. Со ваква оцена излегоа повеќе граѓански здруженија обединети во Платформа за борба против корупцијата.
„И покрај привременото вршење на втората функција, сметаме дека обврска на институциите е да се почитува Законот, кој особено ги уредува прашањата каде што одговорноста, а со тоа и авторитетот, не смеат да бидат сконцентрирани во еден центар на моќ, туку преку контрола и баланс, одговорноста треба да се подели меѓу повеќе фактори кои заемно ќе се контролираат“
сметаат од Платформата.
www.antikorupcija.mk
Според нив, декларативните заложби за борбата против корупцијата се невидливи и апелираат да не се дозволи „една заробена држава да се замени со друга“. За ваквата констатација, наведуваат неколку примери. Еден од нив е, како што пишуваат во соопштението, е кога поранешен висок партиски функционер од партијата на власт, стана дел од управувачки одбор на банка која е во косопственост на лица, кои се под обвинение од СЈО. Друг пример, пак, на кој посочуваат е назначувањето на партиски член за директор на Агенцијата за национална безбедност, што е спротивно на Законот за спречување корупција.
„Ваквите политички и институционални спреги ја попречуваат борбата со високата корупција и дополнително го оневозможуваат носењето рационални антикорупциски политики засновани на анализи, кои се основна претпоставка за долгорочно и одржливо добро управување“
укажуваат од Платформата.
Во фокусот на граѓанските организации се и Законот за јавното обвинителство, за кој сметаат дека е заробен процес на партиски и лични интереси, непостапувањето на наодите на повеќе институции, меѓу кои и Антикорупциската комисија. Од таму, се осврнуваат и на притисоците на вработените во институциите, кои откриваат повреда на законите, како случаите на инспекциските наоди во високото образование.
„Надзорот врз институциите е хиерархиски, а одговорноста за непостапувањето на некоја институција се префрла кај оние задолжени за контрола врз истата. Ги потсетуваме Собранието, Владата, Судскиот совет и Советот на јавните обвинители, градоначалниците и советите на локалните самоуправи дека покрај нивната лична одговорност, тие се одговорни и за функционирањето на институциите што се под нивен надзор. За успешна борба против корупцијата треба да се испрати јасна порака до сите фактори под нивна контрола дека борбата ќе биде бескомпромисна, а по наодите за незаконитост соодветно ќе се постапува“
велат од Платформата.
Во Платформата членуваат вкупно 17 граѓански организации кои работат во делот на владеење на правото и корупцијата. Меѓу нив се Хелсиншкиот комитет за човекови права, Коалиција „Сите за правично судење“, Граѓанската асоцијација „Мост“, Фондацијата „Отворено општество“, „Транспаренси интернешнл“ и други.