Во медиумите се објавуваат прилози за тоа дека кафулињата и кафаните во овој град работат до раните утрински часови, каде се организираат прослави на матури, полуматури, родендени, крштевки
Градоначалникот на Делчево, Горан Трајковски, апелира до граѓаните да ги почитуваат мерките за заштита од коронавирусот и со свој личен пример да придонесат во зачувување на колективното здравје. Неговата изјава е реакција на зголемениот број позитивни случаи на коронавирус во Делчево и на лицата кои се во самоизолација.
„Ова што се случува по рестораните и кафулињата во Делчево, само уште еднаш ја покажува неодговорноста на поединци која може да доведе до ситуација, кога во државава се смирува епидемијата, тука да почне да се разгорува. Делчево беше град, каде со месеци немаше ниту еден случај со коронавирусот. Затоа, апелирам на лична одговорност до секој еден жител на општината, не го загрозувајте здравјето на вашите родители и пријатели, бидејќи никој не може да ве заштити, ниту локалната, ниту државата, ниту СЗО, ако самите не го направите тоа“,
вели Трајковски.
Според последните податоци кои вчера ги објави Министерството за здравство, во Делчево има 3 активни случаи на коронавирус. Нови податоци за денешниот биланс сè уште не се објавени.
Во медиумите се објавуваат прилози за тоа дека кафулињата и кафаните во овој граад работат до раните утрински часови, каде се организираат прослави на матури, полуматури, родендени, крштевки, по игралишта се собираат многу деца, а има и долги редици пред банките, без притоа да се применуваат мерките за заштитна маска и физичко растојание. Во градот, повеќето граѓани воопшто не носат заштитни маски.
Министерот за здравство, Венко Филипче вчера најави дека наскоро ќе се промовира планот за дополнителни рестрикции во региони каде што има појава на поголем број пациенти или се потенцијален ризик.
Враќањето на полицискиот час може да биде една од мерките, како и затворање на училишта, на угостителски објекти и забрана за собири.