Министерот смета дека бугарската реакција за нападот на Пендиков беше асиметрична и вели дека тој го посетил во болница токму за да покаже дека ние како држава не поддржуваме такви напади
Министерот за надворешни работи Бујар Османи, по посетата во болницата во Софија на секретарот на бугарскиот клуб „Цар Борис Трети“ Христијан Пендиков, кој беше претепан, немал повеќе со него комуникација, но се надева дека тој ќе се врати во земјава.
„Не сум имал повеќе комуникација бидејќи во државата има процес по однос на тоа случување. За мене беше важно реакцијата на Република Бугарија која морам да кажам дека беше асиметрична за тоа што се случи обвинувајќи ја државата за системска дискриминација и системски напад. Беше многу важно да кажеме дека како држава не поддржуваме такви напади, особено кога се на етничка основа, и затоа беше мојата посета во Софија – и да покажам внимание кон наш државјанин и да покажам пред ЕУ дека тоа не е политика на државата и дека таквите напади не ги рефлектираат вредностите на нашите граѓани. Се надевам дека брзо ќе се врати затоа што нашите државјани треба да ги имаат сите можности и да ја почувствуваат сигурноста што ја обезбедува државата. Поради какви било етнички, политички, идеолошки размислувања никој не треба да се чувствува несигурно во оваа држава“,
рече Османи.
Откако Пендиков беше нападнат, бугарските власти со авион го пренесоа да се лекува во Софија. Министерот Османи на 22 јануари годинава беше да го посети. Во меѓувреме, на 28 февруари годинава започна судскиот процес против еден од напаѓачите на Пендиков, но нападнатиот не дојде во Охрид, па оттука дојде и денешната изјава на шефот на дипломатијата кој одговараше на прашање дали тој ќе се врати во земјава со оглед дека не дојде на првото рочиште.
Следното е закажано за 5 април, а адвокатот на Пендиков на 28 февруари рече дека неговиот клиент ќе дојде во суд кога ќе може да зборува.
Тогаш новинарите го потсетија дека Пендиков имаше интервју за бугарска телевизија во кое зборуваше, но адвокатот само кратко одговори дека „не го гледал“.