Украинскиот претседател Володимир Зеленски, како што пренесува Ројтерс, го поздравил заклучокот од истрагата на МААЕ , во видео обраќање во кое навел дека единствените валкани работи во нашиот регион во моментов се „главите на оние во Москва кои, за жал, ја презедоа контролата врз руската држава и ја тероризираат Украина и целиот свет“
Меѓународната агенција за атомска енергија (MAAE) денеска соопшти дека не пронашла докази за постоење на непријавена нуклеарна активност на три локации во Украина што ги прегледала на барање на Киев, а како одговор на обвинувањата на Москва дека се работи на „валкана бомба“, јавува „Ројтерс“.
Москва постојано ја обвинува Украина дека работи и планира да користи ваква бомба, односно конвенционална експлозивна направа опкружена со радиоактивен материјал и тврди дека институтите поврзани со нуклеарната индустрија биле вклучени во подготовките, без да презентира докази. Украинската влада ги негираше обвиненувањата на Москва.
Украинскиот претседател Володимир Зеленски, како што пренесува Ројтерс, го поздравил заклучокот од истрагата на МААЕ , во видео обраќање во кое навел дека единствените валкани работи во нашиот регион во моментов се „главите на оние во Москва кои, за жал, ја презедоа контролата врз руската држава и ја тероризираат Украина и целиот свет“.
Некои украински и западни функционери ја обвинија Москва дека излегува со овие обвинувања како алиби за активирање на сопствената валкана бомба, а потоа вината да ја префрли на Киев.
„Во текот на изминатите неколку дена, инспекторите можеа да ги спроведат сите активности што планираше да ги спроведе МААЕ и добија неограничен пристап до локациите. Врз основа на евалуацијата на досега достапните резултати и информациите дадени од Украина, агенцијата не најде никакви индикации за непријавени нуклеарни активности и материјали на локациите “,
се вели во соопштението на Меѓународната агенција за атомска енергија со седиште во Виена.
МААЕ минатиот месец соопшти дека ќе прегледа две локации во Украина по барање на Киев. Во понеделникот агенцијата соопшти дека проверките на местата почнале, а во четвртокот излегоа со информција дека тие биле завршени на три локации, а не на две, од кои сите биле споменати од Русија.
Според Меѓународната агенција за атомска енергија станува збор за локациите: Институт за нуклеарни истражувања во Киев, Источна рударска и преработувачка фабрика во Жовти Коди и Друштво за производство Пивденји – фабрика за машини во Днипро.
Во соопштението се додава дека инспекторите, исто така, зеле примероци од околината на локациите кои ќе бидат испратени на лабораториска анализа, по што Агенцијата ќе поднесе извештај за резултатите.