Ова за „360 степени“ го одговорија од Основното јавно обвинителство Скопје откако попладнево контроверзниот српски политичар Срѓан Ного на социјалните мрежи најави дека утре ќе објави снимки од грабнувањата на Вања и на Панче, како и други снимки од грабнувачите кои биле забележани од камери за видеонадзор
Сите потребни докази за утврдување на траекторијата на движењето на осомничените се обезбедени и оттука не постои никаква опасност за компромитација на истрагата за убиствата на Вања Ѓорчевска и на Панче Жежовски со објава на снимки од видеонадзор на објекти.
Ова за „360 степени“ го одговорија од Основното јавно обвинителство Скопје откако попладнево контроверзниот српски политичар Срѓан Ного на социјалните мрежи најави дека утре ќе објави снимки од грабнувањата на Вања и на Панче, како и други снимки од грабнувачите кои биле забележани од камери за видеонадзор.
„Јавното обвинителство ги има обезбедено сите потребни докази за утврдување на траекторијата на движењето на осомничените. Од тие причини не постои никаква опасност за компромитација на истрагата со објава на снимки од видео надзор на објекти. Сепак, лицата кои ги објавуваат овие видеоснимки треба да размислат за етичноста на ваквите објави и за вознемирувањето што го предизвикуваат кај семејствата на жртвите“,
велат од Обвинителството.
Српскиот политичар Срѓан Ного, поранешен пратеник и член на десничарската и националистичка партија Двери во Србија, во две засебни објави на социјалните мрежи соопшти дека утре ќе објави ексклузивни видеоснимки од киднапирањата на Вања и нс Панче, за чие грабнување и убиство првоосомничен е Љупчо Палевски-Палчо.
„Ексклузивно ги објавувам снимките од киднапирањето на Вања Ѓорчевска од 27 ноември во 7:29 како и сите други снимки од киднаперот снимени од камерите. И ексклузивно објавувам видео од ‘киднапирањето’ на Панче Жежовски, фризерот од Велес. Ќе дознаете како течеше истрагата и кој всушност ги разреши двата случаи, со нив го поврза Љупчо Палевски – Палчо и обезбеди докази за апсењето на штипјанецот Влатко Кешишов, Велибор Манев и Боре Видевски од Велес. Очекувајте ексклузива во петок 5.1. во 16 часот“,
пишува Ного во објавата.
Тој објави и две принтскрин-фотографии од, најверојатно, видеоснимките за кои најави дека ќе ги објави утре, а на кои се гледа „ситроенот“ со велешки регистарски таблички во сопственост на велешанецот Панче, со кој, според досегашните сознанија на Обвинителството, е извршено грабнувањето на 14-годишната Вања Ѓорчевска.
??? ЕКСКЛУЗИВНО објављујем снимак отмице Вање Ђорчевске од 27. новембра у 07.29.30 часова, као и све друге снимке отмичара које су забележиле камере. Такође ЕКСКЛУЗИВНО објављујем и снимак “отмице” Панча Жежовског, фризера из Велеса. Сазнаћете како је текла истрага и ко је у… https://t.co/yzaSp6tRDw pic.twitter.com/I3huL90i3v
— Срђан Ного (@srdjan_nogo) January 4, 2024
Инаку, Срѓан Ного, како што пишува во биографијата објавена на неговата веб-страница, е еден од основачите и водачите, прво на движењето, а потоа и на партијата Двери во Србија. За пратеник во српскиот парламент е избран на изборите во 2016 година и таму останува до 2020 година. Во 2019 година бил исклучен од партијата, а до крајот на мандатот дејствувал како независен пратеник. Важи за промотор на теории на заговор и експонент на руските интереси во регионот.