Ревизорскиот извештај за 2024 година открива низа системски слабости, несоодветно материјално работење и значителни доцнења во евиденцијата и наплатата на побарувањата
Државниот завод за ревизија (ДЗР) изрази неповолно мислење за вистинитоста и објективноста на финансиските извештаи, како и за усогласеноста со законската регулатива во работењето на Бирото за метрологија, кое е во состав на Министерството за енергетика, рударство и минерални суровини.
Ревизорскиот извештај за 2024 година открива низа системски слабости, несоодветно материјално работење и значителни доцнења во евиденцијата и наплатата на побарувањата.
Ревизорите, како што се наведува во извештајот, утврдиле дека има неевидентирана имотна вредност. Опрема и средства во вредност од 145,19 милиони денари, што е околу 2,3 милиони евра, набавени во минатото, сè уште не се внесени во деловните книги поради нереализирано примопредавање со Министерството за економија и труд. Утврдени се и разлики меѓу пописот и сметководството кај основните средства од 5,54 милиони денари.
Во извештајот е наведено дека мобилната лабораторија за испитување на нафтени деривати и придружната опрема, набавени во 2019 и 2021 година во вкупна вредност од над 62 милиони денари, во текот на 2024 година воопшто не се користеле бидејќи Државниот пазарен инспекторат не доставил барања за анализи.
Со ревизијата е утврдено дека од вкупно фактурираните 182,9 милиони денари за верификација во 2024 година, дури 82,09 милиони денари, односно околу 1,3 милиони евра, се однесуваат на барања поднесени уште во периодот од 2018 до 2023 година.
„Ревизијата утврди слабости во процесот на управување со предметите и наплатата на услугите, односно постапките се спроведуваат без донесена интерна процедура, а не се утврдени ниту рокови за распределба, контрола и одобрување на предметите“,
се наведува во извештајот.
Ревизорите утврдиле слабости и во следењето и контролата на приходите кои Бирото ги остварува од услуги за верификација на мерила што ги вршат овластени правни лица.
Тие на Бирото треба да му уплаќаат 20 отсто од извршените услуги за верификација, но било констатирано дека доцнат со уплатите од 6 до 9 месеци по истекот на кварталот, во кој се извршени услугите, што создава ризик од ненавремена и нецелосна наплата на приходите.
Ревизијата утврдила и дека побарувањата од хомологација не се книжат навремено. Во 2024 година се книжеле фактури издадени во 2023 година и се во вредност од 2,32 милиони денари, додека во 2025 година се префрлени побарувања од 2024 во износ од 1,47 милиони денари.
Недостаток бил евидентиран и при набавка на материјали. За набавените пломби, жигови и налепници во вредност од 4,26 милиони денари не е воспоставена сметководствена и материјална евиденција, иако истите се користат при вршењето на услугите за верификација на мерните инструменти и се основа за остварување на приходите.
Со ревизијата е утврдено и дека Бирото нема воспоставено евиденција за издадените одобренија за тип на производ и согласности за регистрација кои произлегуваат од Законот за возила, бидејќи Министерството за внатрешни работи (МВР) сè уште нема воспоставено функционален регистар на возила за внес и размена на податоци меѓу надлежните институции.
За надминување на сите состојби, Државниот завод за ревизија доставил низа препораки до Бирото.