Поранешниот директор на УБК и актуелен советник на министерот Наќе Чулев, Љупчо Андоновски, во телефонски разговор за ТВ24 потврди дека на 3 јуни бил во друштво на Христијан Мицкоски во затворениот дел во кафеаната на улица „Боемска“ во Дебар маало.
И тој како и партискиот лидер вели дека ако треба ќе ја плати и казната доколку направил прекршок. Прашан зошто спротивно на протоколите седеле во угостителскиот објект, Андоновски исто како и Мицкоски порача дека не може да ги следи сите мерки кои според него се менуваат „во 5 до 12“.
„Не бевме вечерта таму, преку ден кратко се задржавме околу половина час, или еден час некаде. Не бевме таму за седнување требаше нешто да видиме. Точно е бевме со Христијан Мицкоски и уште еден пријател кој не е Ален Зекиров како што се шпекулираше во јавноста. Винаријата е посебен објект. Ќе си ја платам казната ако треба, јас се чудам како до сега не нè ставија во притвор“,
вели Андоновски за ТВ24.
Според информации на ТВ24, приемникот со снимките од безбедносните камери во објектот при претресот биле пронајдени во едно од бурињата, откако претходно два часа службениците ги барале. Андоновски е информиран и за тоа но вели не е точно.
Лидерот на најголемата опозициска партија уште вечерта на Фејсбук призна дека бил во кафеана во Дебар Маало, но не знаел дека не е дозволено да се седи во затворениот дел, бидејќи многу често се менувале мерките.
Дополнителната заменик-министерка за внатрешни работи, Славјанка Петровска, најави дека се работи на случајот и дека ќе има пријави за сите инволвирани кои ги прекршиле мерките, но и за попречувањето на работата на инспекторите.