На прашањето дали смета дека сето она со што се пофали за сработено е успех на кабинетот на Фатмир Меџити или е успех на здравствениот систем бидејќи станува збор за работи кои се почнати пред тој да дојде за министер, Меџити рече дека кабинетот на министерот го подразбира целиот здравствен систем
Министерот за здравство Фатмир Меџити, кој изминативе денови е актуелен во јавноста со донесувањето одлука за разрешување на директорот на Клиниката за кардиохирургија, Сашко Јовев, вели дека не е љубител на промовирање по социјалните мрежи или, пак, со пи-ар. Тој смета дека со тие пари може да се реновираат неколку тоалети на некоја клиника.
„Не сум некој љубител на социјалните мрежи, па ниту на пи-ар. Кога ми рекоа дека за пи-ар треба да платиме големи суми, јас реков подобро три-четири тоалети да реновираме на клиниките со тие пари. Јас сум човек од акција и не сакам да коментирам. Од првиот ден кога дојдов за министер реков дека јас сум доктор, човек од акција и сакам тука да ставам еден нож хируршки и нема да се занимавам со минатото. За мене е многу важна сегашноста и иднината на граѓаните и на пациентите“,
рече Меџити прашан за одговор на коментарот што на Фејсбук го објавил неговиот претходник, Беким Сали, во кој го нарекува министерот „аџи пишман Меџити“.
Меџити ваквите одговори ги даде на прашања кои новинарите му ги упатија на прес-конференција на која презентираше што сработил со неговиот кабинет во изминатите сто денови откако стапи на министерската функција.
За првите сто дена, меѓу другото, тој се пофали со покачување на платите за сите вработени, лекари, сестри, лаборанти, болничари и хигиеничари за 2 000 до 3 000 денари и зголемен надомест за дежурства од 125 до 166 отсто…
„Освен повисоки плати за докторите, реновиравме многу оддели, Центар за дијабетес, Одделот за гастроентерохепатологија, оддел во Клиниката за ендокринологија, оддел на Клиниката за токсикологија, во Гостивар одделот за педијатрија, Тетово – Ургентен центар – се само дел од клиниките кои се реновирани“,
рече министерот.
Меџити, исто така, посочи дека се отворил Центар за црн дроб, се ажурирала позитивната листа која не била ажурирана од 2015 година, се работи на дигитализација на здравствени услуги, се направила мобилна апликација „мое здравје“.
Министерот се пофали и дека е воведена роботика во ортопедијата, во тек се тендери за лифтови за Клиниката за хематологија, за клиниката во Тетово, спроведена е акција „садиме здравје“, засадени се 100 стебла на Клиника, улиците се средени, странци ќе плаќаат исто како нас за здравствените услуги.
На прашањето дали смета дека сето она со што се пофали за сработено е успех на кабинетот на Фатмир Меџити или е успех на здравствениот систем бидејќи станува збор за работи кои се почнати пред тој да дојде за министер, Меџити рече дека кабинетот на министерот го подразбира целиот здравствен систем.