Тие упатија низа прашања до обвинетиот, притоа нагласувајќи со кое право се бара олеснување на мерките додека, како што наведуваат, 63 семејства секојдневно ја преживуваат истата загуба, а повеќе од 200 повредени и натаму се соочуваат со последиците
На денешното рочиште од судењето за пожарот во кочанското т.н кабаре „Пулс“, одбраната на првообвинетиот, сопственикот на „Пулс“, Дејан Јованов-Деко, побара да му биде заменет притворот со мерка куќен притвор поради сериозно и алармантно влошување на неговата здравствената состојба
Родителите на загинатите во пожарот во т.н. кабаре „Пулс“ во Кочани денеска во објава на фејсбук-профилот на Здружението на граѓани „16 март 2025“ реагираат на барањето на одбраната на првообвинетиот Дејан Јованов-Деко да му биде заменет притворот со мерка куќен притвор, оценувајќи дека таквиот потег претставува навреда за нивната болка и понижување на споменот на нивните деца.
Во реакцијата тие посочуваат дека додека живеат со загубата и секојдневната тишина во своите домови наместо одговорност гледаат обиди за како да се избегне.
„Додека ние живееме со празни домови, со недопрени соби и со тишина што ни гуши секој ден, наместо одговорност гледаме упорни обиди за бегство од тежината на одговорноста“,
се вели во реакцијата на Здружението на граѓани „16 март 2025“.
Особено загрижувачки, според нив, е фактот што дел од обвинетите веќе добиле олеснување на мерките, што создава впечаток дека трагедијата се минимизира.
„Додека ние стоиме над гробовите на нашите деца, некој бара полесни услови. Додека ние секој ден ја преживуваме истата ноќ, некој бара удобност. Дали воопшто се запрашавте – имаа ли нашите деца ‘олеснителни услови‘ додека умираа? Имаме доверба дека Јавното обвинителство и судот ќе постапат строго согласно закон и врз основа на докази, и дека нема да дозволат правдата да биде обесмислена со вакви барања“,
пишува во соопштението.
Семејствата на загинатите упатија низа прашања до обвинетиот, притоа нагласувајќи со кое право се бара олеснување на мерките додека, како што наведуваат, 63 семејства секојдневно ја преживуваат истата загуба, а повеќе од 200 повредени и натаму се соочуваат со последиците.
„Со кое лице бараш олеснување на мерките, додека 63 семејства секој ден ја преживуваат истата загуба? Дали навистина сметаш дека твојата здравствена состојба е потешка од празнината што остана во нашите домови? Дали барем еднаш помисли на тие 63 животи кога го поднесуваше ова барање? Дали помисли на повеќе од 200 повредени, кои и денес се борат со последиците? Дали знаеш колку од нас, семејствата на починатите и преживеаните, сè уште живеат со трауми, болка, страв и неизвесност? Што им порачуваш на нашите семејства, на преживеаните, кои секој ден повторно и повторно ја преживуваат истата ноќ? Дали сметаш дека нашата болка е помала од твојата? Дали воопшто може и да ја споредиш? Што значи за тебе човечност, морал, совест и одговорност? Дали имаш храброст да застанеш пред родителите и семејствата на починатите млади лица и пред повредените, и да им погледнеш во очи?“,
се прашањата што му ги упатија на првообвинетиот.
Во реакцијата се нагласува дека не бараат пресуда надвор од институциите, туку очекуваат правдата да биде задоволена во судска постапка.
„Имаме доверба дека Јавното обвинителство и судот ќе постапат согласно закон и врз основа на докази. Не бараме пресуда на улица, туку правда во судница – и ќе ја бараме сè додека не ја добиеме“,
велат семејствата.
На денешното рочиште од судењето за пожарот во кочанското т.н кабаре „Пулс“, одбраната на првообвинетиот, сопственикот на „Пулс“, Дејан Јованов-Деко, побара да му биде заменет притворот со мерка куќен притвор поради сериозно и алармантно влошување на неговата здравствената состојба.
Бранителот на Деко, адвокатката Ивана Коцевска, изјави дека мерката притвор не соодветствува со целта, ова не е мерка за обезбедување присуство, туку казна пред судење.
„Импровизирано третирање во затворски услови гарантира катастрофални последици поради несоодветните услови, особено кога неговото здравје континуирано се влошува“,
изјави Коцевска.
Таа кажа дека судот е запознаен со здравствената состојба на обвинетиот и посочи дека нејзиниот клиент е донесен на судење со отворена рана по оперативен зафат, директно од болнички услови.
Судијката Дијана Груевска-Илиевска одговори на барањата на одбраната, нагласувајќи дека судот е во тек со ситуацијата. Според неа, обвинетиот бил опериран во петокот со негова согласност, а лекарите препорачале строго мирување од само три дена.
Поради влошување на здравствената состојба на првообвинетиот Дејан Јованов‑Деко, денеска во судницата во „Идризово“ каде што имаше рочиште за случајот „Пулс“, беше повикана Брза помош.
Подоцна таа во изјава за медиумите рече дека на Деко му била направена сериозна операција на лумбалниот ‘рбет на две нивоа.