Рускиот опозициски лидер Алексеј Навални во своето прво видеоинтервју обвини дека руските разузнавачки служби стојат зад неговото труење со нервниот агенс новичок.
Тој вели дека причината за труењето е што властите го сметале за закана во пресрет на изборите.
„Сфатија дека пред изборите ќе имаат големи проблеми“,
рече Навални во интервју со познат руски блогер.
Навални, кој е отворен критичар на претседателот Владимир Путин, се разбуди од кома на почетокот на септември по лекарската грижа во Берлин.
Тој вели дека сè уште му се тресат рацете и оди на физикална терапија, иако неговото здравје е значително подобрено.
Руските власти ги отфрлија наводите дека е возможно тие да се одговорни за состојбата во која се најде Навални.
Тој на 20 август се онесвести на летот од Томск за Москва откако претходно утрината испил пијалак (чај). Неговите соработници изразија сомнеж дека тој е отруен, а подоцна тоа го потврдија германските лекари.
Навални првично беше хоспитализиран во Омск, а подоцна беше префрлен на лекување во Берлин. По неколку недели третман, тој се разбуди од кома и застана на нозе.