Во трка за директор на Академијата беа уште тројца кандидати – судијата од Основниот Кривичен суд Скопје, Ненад Савески, судијата Андреј Димовски и судијката од Основниот граѓански суд Скопје, Емилија Шопар-Јованова. Савески добил три гласа „за“, пет „против“ и еден „воздржан“, додека судијата Андреј Димовски добил девет гласа „против“. За Шопар-Јованова не се гласало поради неисполнување на условите
Со осум гласа „за“ и еден „воздржан“, Наташа Габер-Дамјановска е реизбрана за директор на Академијата за судии и јавни обвинители. Ова е нејзин втор четиригодишен мандат. Габер-Дамјановска е поранешна уставна судијка и директорка на Институтот за социолошки и политички правни истражувања, а за директор на Академијата првпат беше избрана во ноември 2018 година.
Во трка за директор на Академијата беа уште тројца кандидати – судијата од Основниот Кривичен суд Скопје, Ненад Савески, како и судиите од Основниот граѓански суд Скопје, Андреј Димовски и Емилија Шопар-Јованова.
На денешната седница на Управниот одбор на Академијата, судијата Савески добил три гласа „за“, пет „против“ и еден „воздржан“, додека судијата Андреј Димовски добил девет гласа „против“. За судијката Емилија Шопар-Јованова не се гласало, поради неисполнување на условите.
Точката за избор на директор на Академијата за судии и јавни обвинители, Управниот одбор на Академијата ја тргна од дневниот ред на седницата закажана за 7 декември поради пристигната пријава по пошта на кандидатот Андреј Димовски и потреба да биде разгледана од Комисијата за избор.
На претходниот оглас што беше распишан во текот на летото, од сега пријавените, кандидатура поднесе само Габер-Дамјановска. Противкандидатка ѝ беше судијката Оља Ристова од Кривичниот суд. Меѓутоа, на седница на 30 август членовите на УО не избраа директор. Иако тогаш беше кажано дека и двете кандидатки ги исполнуваат условите за функцијата, ниту една од нив не го доби потребниот број гласови.
Во меѓувреме дојде до промена и на составот на УО, а по истекот на мандатот на Габер-Дамјановска на 30 ноември, како вршители на должност директор на Академијата се сменија две лица кои според закон се од редовите на Управниот одбор.
Првично, на конститутивната седница на новиот УО на 29 ноември, за в.д. директор беше назначен судијата Зоран Герасимовски кој е и член на Судскиот совет. Меѓутоа, тој на 5 декември објави дека по укажувањата од Државната комисија за спречување корупција (ДКСК) дека има судир на интереси поднесе оставка од в.д. директор.
Истиот ден, на седница на УО, привремено до денешниот избор, на функцијата беше поставен Бесир Алиу, обвинител од Тетово.