Поранешниот генерален секретар на ВМРО-ДПМНЕ, како прв говорник во денешната расправа за интерпелацијата, побара оставка од вицепремиерот за европски прашања, обвинувајќи го за лицемерство
С Македонија доби безусловна препорака за почеток на преговорите од ЕС, а соседна Бугарија е таа што го прекрши членот 2 од Договорот, каде што се обврза да ни помага во евроинтеграциите, нагласи вицепремиерот за европски прашања Никола Димитров во една од своите реплики во текот на денешната расправа во Собранието за интерпелацијата што против него ја поднесе опозицијата.
За учество во расправата, која треба да заврши пред полноќ, се пријавени над 60 пратеници. Во досегашниот тек на седницата, Димитров им реплицира на повеќето опозициски пратеници кои го обвинуваат, меѓу другото, и за тоа дека земјата не ги почна преговорите со ЕУ, и покрај договорите со Грција и со Бугарија кои беа потпишани додека тој беше на чело на македонската дипломатија.
„Моја работа е да преговарам и да направам договорите да бидат во најдобар можен интерес за нашата држава. Јас не сум одговорен ако некоја држава одлучи да не го почитува договореното. Второ, НАТО и ЕУ се стратегиска определба на над 80 проценти од граѓаните. Како тогаш, работејќи на тие цели и остварувајќи ја едната – членство во НАТО, јас ги изневерувам или ги носам во заблуда граѓаните? Не сум јас во заблуда, ниту повеќе од 80 проценти од граѓаните се во заблуда, ниту целиот свет е во заблуда, кога ја посочува нашата надворешна политика како светол пример за тоа како треба да се решаваат отворени прашања. Во заблуда сте вие, изолирани, сами, во мрачното самозалажување дека сопките на овој пат и саботажите на овие суштински процеси некако ќе донесат политички поен плус“,
рече Димитров.
Според него, ако опозицијата навистина сакала да го адресира несреќниот развој на настаните поради неевропското однесување на соседот, не требала да се прави дневно-политички перформанс од клучното прашање, туку да се издигне и заеднички да настапува со власта за остварување и на втората стратегиска цел – почнување на пристапни преговори со ЕУ, заеднички поддржувајќи ги принципиелните позиции на земјата.
„И сега, кажете ми како тоа јас ги предадов македонските државни интереси, а Бугарија вели не попуштам и сум еден од главните проблеми за она што тие сакаат да го постигнат? Барате од мене одговорност за меѓувладина конференција со ЕУ, за која јавно кажав дека не треба да се одржи доколку услов е македонскиот јазик“,
нагласи Димитров.
Пратеникот од ВМРО-ДПМНЕ, Игор Јанушев, како прв говорник во расправата за интерпелацијата, го обвини Димитров за лицемерство.
„Министерот Димитров, кога нема што да каже, напаѓа. Ништо не чувме од него, чувме само лаги и флоскули. Димитров е човекот кој изјавуваше дека за идентитетот нема преговори. Човекот кој кажуваше дека барањата на Грција се преседан и дека со промена на уставното име ќе се погазело македонското достоинство. И кој го погази на крај, лично тој… За Бугарија што изјавуваше Димитров, дека јавноста ќе го има во увид целиот процес. Дека државен интерес е Бугарија да биде поддржувач на Македонија кон ЕУ. Не само што ја немаме Бугарија туку Бугарија е главен кочничар за влез на Македонија во ЕУ. Овој човек има четири вета“,
рече Јанушев барајќи оставка од Димитров.
Во својата прва реплика, возвраќајќи му на Јанушев, Димитров рече дека нема да одговори на личните напади, а во однос на обвинувањата за лицемерство кажа дека изјавата ја дал во еден европски панел со адреса ЕУ и целта била да посочи колку регионот на Западниот Балкан, сите балкански народи можат да веруваат во сериозноста на ЕУ кога ЕУ носи одлуки и дава декларации.
„ЕУ донесе безусловна политичка одлука за почеток на пристапни преговори. За разлика од македонскиот случај во фајлот за Албанија имаше редица услови. ЕУ беше таа што рече во јуни 2018 година дека го цртаме патот за почеток на пристапни преговори и прва меѓувладина конференција во јули 2019 година. ЕУ беше таа што рече ќе се навратиме на прашањето најдоцна во октомври 2019 година. ЕУ беше таа што во октомври не донесе одлука и рече ќе се навратиме на прашањето пред Загрепскиот самит во мај 2020. Тоа е целта на таа изјава и ние апсолутно мораме да не го губиме времето во чекање, туку да си работиме на носењето на европските стандарди и принципи дома. Нашата битка за македонскиот идентитет, јас сум убеден и тоа им го говорам на сите земји членки и институции во Брисел, е истовремено и битка за европскиот идентитет. Ако ЕУ ја гледаме како заедница на вредности, една од тие суштински вредности наведена во Лисабонскиот договор е почит, заштита и нега на културните и јазичните различности на сите народи на европскиот континент. И во таа смисла, ако ЕУ е заедница на вредности, не може да биде оспорено, проблематизирано правото на самоопределување на македонскиот народ што говори македонски јазик. Тоа се нашите позиции таму“,
рече Димитров.
Во однос на проектите Димитров изјави дека третата фаза од железничката делница кон Бугарија, СЕП ја доставил на одобрување до службите на Европска комисија. Станува збор за ИПА-апликација за инвестиција вредна 405 милиони евра, каде што 60 милиони евра се обезбедени од ИПА 2, а останатите средства за затворање на финансиската конструкција од заеми.
За владејачкиот СДСМ интерпелацијата е неаргументирана и со неа ВМРО-ДПМНЕ се обидува да ги амортизира владините успеси на надворешен план.