Идејата за кандидат за премиер Албанец е последниот камен во мозаикот за да се оствари една определба на секој Албанец, дека во оваа држава е можно да се остварат сите аспирации, меѓу кои и политичките од највисок степен, вели кандидатот на ДУИ за премиер, Насер Зибери во интервју за „Слободен печат“.
Посочува дека не е член на партијата што го номинира, туку самиот е убеден во оваа идеја.
„Ќе се обидам моите политички ставови да бидат целосно насочени кон мојата идеја за тоа каква држава сакаме, какви односи да градиме, каква перспектива да создадеме за нашите поколенија. Кога моите идеи им ги изложив на предлагачите, тие целосно ги прифатија. Вториот сегмент е дека зад мене сепак стои и конкретен предлагач со своја политичка платформа и програма и кој има интерес тоа го оствари преку првиот човек во извршната власт. Факт е и тоа дека владината програма никогаш не е само пресликување на партиската програма. Македонија е така конципирана и има таква предност да не дозволува еден субјект да доминира во политичкиот живот со примена на една партиска програма. Значи, владината програма ќе биде сплет од неколку вкрстени програми, визии и концепти. Мое ќе биде да се обидам да го применам тоа што ќе биде најдобро“,
вели Зибери.
Тој посочува дека Охридскиот договор е „солидна основа за да се изгради хармонично општество“, а договорите со соседите се основа за државата да напредува во евроатланските структури.
На прашањето со која од големите партии би прифатил да коалицира, Зибери вели:
„Поборник сум на политиката што не го храни етничкото его кај една нација или партија и секоја политика што го инструментализира овој чин за политички интереси за мене е неприфатлива. Второ, кооперативноста треба да се гради врз основа на принципи. Еден од нив е дека евроатлантската ориентација на земјата не треба да се доведе во прашање и инструментите што водат кон тоа не треба да бидат загрозени во ниеден момент. Конкретно – Преспанскиот и Договорот со Бугарија, зашто тоа се гаранции што ни ги отвораат вратите за да одиме напред. Овие принципи ќе ги бранам ако се преговара за создавање парламентарно мнозинство. Охридскиот рамковен договор е капитален за внатрешните односи и тој не смее да биде доведен во прашање. Нема цена што може да ме измести од овие постулати. Дури и да не станам премиер“,
вели Зибери.