Ако овој тест лет мине добро, астронаутите за неколку години би можеле да се вратат на Месечината, но претставници на НАСА предупредуваат дека ризикот е голем и летот може да биде прекинат. Во „Котур“ во Скопје се организира и настан за следење на лансирањето
НАСА е подготвена да ја лансира својата џиновска ракета „Артемис 1“, која е висока 98 метри и претставува најсложената и најмоќната што досега ја имала вселенската агенција. Лансирањето ќе биде од вселенскиот центар „Кенеди“ на Флорида, САД околу 14:30 часот по македонско време.
Претставници на НАСА потврдија дека сите системи се подготвени за лансирања, а временската прогноза предвидува 80 отсто поволни временски услови за првиот лет
Доколку од која било причина дојде до одложување на денешното лансирање на „Артемис-1“ НАСА ги одреди 2 и 5 септември како алтернативни датуми за лансирање.
„Засега сè во врска со вселенското летало изгледа добро. Возбудени сме, ракетата е подготвена и изгледа одлично“,
изјави Џеф Сполдинг, висок претставник на НАСА.
„Артемис 1“ е програма за човечки вселенски летови што ја предводи НАСА и чија цел е да се вратат мисиите на Месечината откако последен пат таму беа испратени 12 астронаути во рамки на програмата Аполо пред половина век. Денешниот е тест лет кој ќе биде планиран без екипаж.
Доколку овој шестнеделен тест мине добро, астронаутите за неколку години би можеле да се вратат на Месечината, но претставници на НАСА предупредуваат дека ризикот е голем и летот може да биде прекинат.
По повод лансирањето на „Артемис 1“ во Скопје во кафулето „Котур“ се организира и настан за следење во живо на полетувањето.