Девизните резерви кои се клучни за одржување на стабилноста на курсот на домашната валута се на високо ниво – двојно повисоко од пред глобалната економска криза во 2008 година, велат од кабинетот на гувернерката
Девизниот курс на денарот е стабилен и нема промени во неговото ниво. Средниот курс на еврото, според курсната листа на Народната банка, изнесува 61,69 денари и истиот е непроменет во однос на лани, соопштија доцна вечерва од централната банка, демантирајќи ги „информациите кои излегоа на некои од порталите и на социјалните мрежи дека е покачен курсот на еврото“.
Од Народната банка посочуваат дека во стабилноста на курсот на денарот може да се увери секој кој би ја посетил веб страницата на институцијата https://www.nbrm.mk/kursna_lista.nspx, каде што секојдневно се објавуваат вакви податоци и која, како што се посочува, е единствен релевантен извор на информации според кој населението и фирмите може да го следат девизниот курс на домашната валута. Веб страницата, се нагласува во соопштението од кабинетот на гувернерката Анита Ангеловска Бежоска, ги отсликува цените на валутите од реалните тргувања на домашниот девизен пазар.
„Народната банка располага со низа инструменти со кои ја гарантира стабилноста на денарот во однос на еврото. Девизните резерви кои се клучни за одржување на стабилноста на курсот на домашната валута се на високо ниво – двојно повисоко од пред глобалната економска криза во 2008 година“,
велат од кабинетот на Бежоска.
Оттаму посочуваат и дека треба да се прави разлика помеѓу курсната листа за вршење на платен промет со странство за потребите на државните органи и средниот курс кој е релевантен податок за вредноста на валутите.