Министерот за правда, Бојан Маричиќ, најави дека на владината седница која е во тек, предвидено е да се усвојат повеќе законски измени и новини, меѓу кои и тоа дека нападот врз новинар ќе се смета како напад врз службено лице, намалување на казните за клевета и навреда, како и воведување на кривичното дело „демнење“.
Со дефинирање на нападите врз новинарите како напади врз службени лица, министерот вели дека ќе се зголеми безбедноста на сите медиумски работници. Предвидена е и казна од 3 месеци до 3 години затвор за закана упатена кон новинар или медиумски работник. Министерот кажа дека при вакви случаи, Обвинителството ќе постапува по службена должност.
„Казнената рамка за овие кривични дела за напад на новинарите е до три години затвор и сметаме дека тоа е изедначено со нападот врз службено лице, кое се однесува на професиите кои се заштитени со закон како службени лица. Ние по денешното усвојување од страна на Владата, веднаш ќе ги проследиме измените во Собранието. Очекувам во Собранието да се изгласаат веднаш по летната пауза“,
кажа Маричиќ и појасни дека попречување на работата на новинарите или директен физички напад ќе се третира како напад врз службено лице.
Тој најави дека со измените во Законот за граѓанска одговорност за навреда и клевета, новинарите ќе плаќаат максимални 400 евра отштета за клевета и навреда по изгубен судски спор, за разлика од досегашното решение, каде оваа сума изнесуваше 2 000 евра.
За уредниците, надоместокот на штета немa да биде поголем од 2 000, што во постојниот закон е 10 000 евра.
За правното лице пак, од 15 000 евра, износот се намалува на максимални 5 000 евра отштета.
„Правиме 5 пати намалување на отштетата за новинарите и уредниците, а 3 пати за медиумите“,
кажа Маричиќ.
Се воведува ново кривично дело – демнење, со кое се предвидува парична или затворска казна за вознемирување на интернет.
„Откако измените ќе стапат на сила, тој што неовластено ќе следи, прогонува или на друг начин ќе се меша во личниот живот на друго лице, или со него воспоставува или се обидува да воспостави несакан контакт, со движење во просторот каде се наоѓа тоа лице, со злоупотреба на личните податоци, со користење на средства за јавно информирање и други средства за комуникација, или на друг начин психички го злоставува, вознемирува или застрашува, ќе се казни парично, а може да добие и затворска казна до три години“,
посочи Маричиќ.
На владина седница денеска е и Законот за Фонд на жртви од кривични дела на насилство, Законот за парнична постапка, Законот за адвокатура, Законот на Академија за судии и јавни обвинители, како и транспонирање на полициска директива во предлог-закон за заштита на физичките лица во врска со обработката на личните податоци во текот на постапување на истражните органи за кривични дела.
Маричиќ најави дека утре ќе одржи брифинг со новинарите, на кој детално ќе информира за сите законски новини.