Затоа, како што велат оттаму, од МОН побарале ваквиот процес итно да биде запрен, а да се отпочне нов откако ќе се направи сеопфатна анализа на постојниот Закон во која ќе бидат вклучени сите засегнати страни
„Само на тој начин МОН и Владата ќе покажат дека не ги повторуваат грешките од минатото. Нема да дозволиме мала група на луѓе од позиција на моќ да одлучуваат за закон кој ја засега целата академска заедница“, велат оттаму
Независниот академски синдикат (НАкС) соопшти дека со загриженост ги следи најавите од Министерството за образование и наука (МОН) дека до крајот на годината Законот за високо образование од 2018 година ќе претрпи измени. Дополнително, велат оттаму, ресорниот министер Јетон Шаќири го одбил нивното барање за средба во која би се запознале со целите на законските измени, што, како што велат, потврдува оти процесот е затворен и без вклученост на сите чинители.
„Сето ова нè потсетува на едни минати и мрачни времиња, кога законски измени беа туркани низ Собранието со фуриозно темпо и без суштинска расправа, во крајно нетранспарентни процеси, и тоа во интерес на многу мала група на луѓе“,
наведува Синдикатот.
Затоа, како што велат оттаму, од МОН побарале ваквиот процес итно да биде запрен, а да се отпочне нов откако ќе се направи сеопфатна анализа на постојниот Закон во која ќе бидат вклучени сите засегнати страни.
„Само на тој начин МОН и Владата ќе покажат дека не ги повторуваат грешките од минатото. Да ве потсетиме на општествените промени кои започнаа во 2014 година – нема да дозволиме да се руши она за кое сме се избориле. Нема да дозволиме мала група на луѓе од позиција на моќ да одлучуваат за закон кој ја засега целата академска заедница“,
порача Независниот академски синдикат во реакцијата.
Од Синдикатот велат дека иако имплементацијата на актуелниот Закон за високо образование од 2018 година се спроведува бавно во некои сегменти, но сепак, „може да се пофали со обидот да се демократизира заробеното високо образование, од реформација на универзитетските студентски собранија до изборот на ректорите на непосредни избори, каде секој член на наставно-научните и на наставноуметничките совети добива право на глас“.
„Деновиве од кулоарите на различните тела и преку медиумите добиваме штури информации за процеси и наводни предлози со кои се засегнати некои од клучните придобивки на сегашниот Закон. Во кулоарите на Интеруниверзитетската конференција, единственото тело за коешто дознаваме дека е вклучено во процесот, се чини дека токму овие процеси за демократизација се предмет на измени. А тоа како дошло до овие предлози без консултации во високообразовните установи коишто ректорите ги претставуваат во Интеруниверзитетската конференција е прашање со кое сериозно треба да се позанимаваат сенатите на универзитетите како надлежни органи на управување“,
пишува во реакцијата на НАкС.
Во „протечените документи“, додава Синдикатот, „главна преокупација на измените е како мандатите на деканите и ректорите да се зголемат од три на четири години, како нивните управи да ги преземат ингеренциите на наставно-научните совети и универзитетскиот сенат, како спроведувањето на постапката за нивниот избор да се врати во мала и ’избрана’ група“.
Од друга страна, пак, велат оттаму, за наставниците се планираат само никогаш неразбраните импакт фактори како „магла“ која треба да ги подисплаши и дополнително покори.