Во таа насока, од Советот апелираат до сите носители на јавни функции, „во своето работење и делување доследно да ги почитуваат Уставот, законите и меѓународните договори ратификувани согласно Уставот, со цел владеење на правото и враќање на довербата кај граѓаните во системот“
Судскиот совет денеска преку писмено соопштение изрази загриженост во врска со изјавите на носителите на највисоките функции на државната власт кои, како што велат, директно влијаат врз перцепцијата и довербата на граѓаните за работата на Советот и судството.
Телото во чија надлежност е изборот, оценувањето и разрешувањето на судиите деновиве е под засилен фокус на јавноста, откако владејачкото мнозинство во Собранието поднесе интерпелација на петмина членови на Судскиот совет избрани од законодавниот дом.
„Судскиот совет на Република Северна Македонија изминатиот период внимателно ги следи случувањата во врска со изјавите на носителите на највисоките функции на државната власт и изразува загриженост бидејќи истите се одразуваат на интегритетот на членовите на Судскиот совет и на судиите и директно влијаат врз перцепцијата и довербата на граѓаните за работата на Судскиот совет и судството“,
велат од Судскиот совет.
Ваквите изјави оттаму ги оценуваат како обид за поткопување на независноста на судската власт преку притисок врз членовите на Советот и судиите. Тоа, како што се додава, е директна закана за независноста и демократијата на државата и владеењето на правото.
„Во секоја правна држава, независноста на судската власт е еден од основните столбови за гарантирање на законитоста, правдата и заштита на правата и слободите на граѓаните. Членовите на Судскиот совет и судиите мора да бидат ослободени од каква било форма на притисок и влијание, за да истите одлучуваат самостојно и независно“,
се наведува во соопштението на Судскиот совет.
Во таа насока, од Советот апелираат до сите носители на јавни функции, „во своето работење и делување доследно да ги почитуваат Уставот, законите и меѓународните договори ратификувани согласно Уставот, со цел владеење на правото и враќање на довербата кај граѓаните во системот“.
За потсетување, пратеничките групи на ВМРО-ДПМНЕ, „Вреди“и ЗНАМ на 7 февруари поднесоа интерпелација за работата на членовите на Судскиот совет кои се избрани од страна на Собранието.
Станува збор за членовите Селим Адеми, Павлина Црвенковска, Весна Дамева, Миљазим Мустафа и Тања Чачарова-Илиевска.
Собранието ги испрати интерпелациите до членовите и се очекува нивен одговор во рок од десет дена. Седницата, според најавите, би требало да се одржи на крајот на овој месеци или на почетокот на март. Интерпелациите со сигурност ќе бидат изгласани, но тие нема да значат и разрешување на членовите на Советот по автоматизам. Дали ќе се повлечат или ќе останат на функциите, тие ќе треба сами да одлучат.
Премиерот Мицкоски, кој уште во предизборието најави „разрешување“ на Судскиот совет, а најавувајќи ги интерпелациите минатата недела рече дека почнува „ударот во чело“ на Советот, изјави дека Собранието не може да ги разреши, но оти очекува дека по интерпелациите тие самите да се повлечат.
Интерпелациите на дел од членовите на Судскиот совет завчера ги коментираше и претседателката на државата, Горадана Сиљановска-Давкова, која одговарајќи на новинарско прашање, кажа дека членовите на Судскиот совет не се избрани за да бидат судски скандал-мајстори, туку да оневозможуваат какво било скандализирање на независната судска власт. Таа рече дека очекува членовите на Советот да си поднесат оставки, велејќи дека тоа е „апел до моралот, до етиката на судиите“.
Според претседателката на државата, исходот од интерпелациите е повеќе од извесен бидејќи зад иницијативата застанаа 67 пратеници, а за да поминат е потребно апсолутно мнозинство од 61 пратеник.
Интерпелациите на членови на Судскиот совет и иницијативата за разрешување на републичкиот јавен обвинител Љупчо Коцевски беа дел од темите на кои денеска својот став го сподели лидерот на СДСМ, Венко Филипче, кој рече дека овие чекори на Владата не претставуваат никаква реформа, туку притисок и партизација на судскиот систем.
Според Филипче, ако сега се направи упад во системот, тогаш целокупниот реформски процес ќе се одложи за шест години.
„Сметам дека нема ниту една причина да не одиме по реформскиот пат на судството кој произлегува од планот за раст на Брисел. Како партија ќе поддржиме реформски закони во таа насока, сè друго сметаме дека е упад во системот и обид за партизација“,
рече Филипче.