Украинскиот претседател Володимир Зеленски вели дека во нападот биле вклучени беспилотни летала и балистички ракети
Најмалку четири лица се убиени, а 13 се повредени во руски воздушни напади врз Киев и околината во раните утрински часови, соопштија властите.
Украинскиот претседател Володимир Зеленски вели дека во нападот биле вклучени беспилотни летала и балистички ракети.
„Има уништување на станбена и цивилна инфраструктура. Во Бориспиљ, оштетена е петкатна зграда. Педесет лица се евакуирани. Потребните служби се на лице место. Имаше и напади врз претпријатија. Вкупно четири лица загинаа, а 13 се повредени во градот“,
пишува Зеленски.
Тој додава дека нападите продолжиле и во Одеса и регионот.
„Киевскиот Регион беше цел на масовен напад од руски ракети и беспилотни летала синоќа“,
објави Тимур Ткаченко, началник на Киевската регионална воена администрација, на Телеграм.
Украинската државна служба за вонредни состојби објави дека Русија масовно го нападнала регионот Одеса, каде што биле погодени станбени, енергетски и пристанишни инфраструктурни објекти.
Од Службата објавуваат и дека во Запорожје со дрон било нападнато противпожарно и спасувачко возило, при што се повредени четворица спасувачи кои биле хоспитализирани со повреди со различна тежина.
Нападите го означија шестиот ден по ред непрекинати руски воздушни напади врз Киев и околината, нарушувајќи го секојдневниот ритам на животот на милиони луѓе.