Во кафулето кое било цел на нападот, како што изјави украинскиот министер за внатрешни работи, Ихор Клименко, биле околу 60-ина луѓе кои присуствувале на комеморација по погреб на свој сограѓанин. Меѓу загинатите е и шестгодишно дете
Најмалку 50 лица загинаа во руски ракетен напад врз селска продавница и кафуле во областа Харков во источна Украина. Според бројот на загинати, ова е еден од најтешките руски напади во последните месеци.
Во кафулето кое било цел на нападот, како што изјави украинскиот министер за внатрешни работи, Ихор Клименко, биле околу 60-ина луѓе кои присуствувале на комеморација по погреб на свој сограѓанин.
„На оваа комеморација имаше луѓе од секое семејство, од секое домаќинство. Ова е страшна трагедија“,
изјави Клименко.
Официјален Киев соопшти дека меѓу загинатите е и шестгодишно момче. Во нападот се повредени уште седум лица кои се пренесени в болница.
Украинското обвинителство објави фотографии на кои се гледаат раскрвавени тела и екипи на итната помош кои ги пребаруваат урнатините на погодениот објект. Според прелиминарните информации на Украина, цивилниот објект бил погоден со проектил „искандер“.
Украинскиот претседател Володимир Зеленски го опиша нападот како целосно намерен, брутален и терористички.
„Руски проектил погоди обична самопослуга во областа Харков. Ова беше целосно намерен, демонстративен и брутален терористички напад. Рускиот терор мора да се запре. Сите оние кои и помагаат на Русија да ги заобиколи санкциите се криминалци. Оние кои продолжуваат да ја поддржуваат Русија, го поддржуваат злото“,
напиша Зеленски на социјалната мрежа Х (поранешен Твитер).
Russian missile struck an ordinary grocery store in the Kupiansk district of the Kharkiv region. This was a fully deliberate, demonstrative, and brutal terrorist attack.
— Volodymyr Zelenskyy / Володимир Зеленський (@ZelenskyyUa) October 5, 2023
As of now, more than 51 people have been reported dead. My condolences to all those who have lost their loved… pic.twitter.com/yxIW2Xwy35
Украинскиот лидер, кој моментално е на Самитот на Европската политичка заедница во Шпанија, рече дека Русија ги користи овие напади за да „ја направи геноцидната агресија нормална за целиот свет“. Тој посочи дека Украина „ќе им одговори на терористите“ и дека во тек се преговори со европските лидери за зајакнување на воздушната одбрана и заштита на земјата од терор.