Десетици предвремено родени бебиња и 45 бубрежно болни на кои им е потребна дијализа не можат да добијат соодветен третман поради недостиг на електрична енергија
Најголемата болница во Газа, „Ал Шифа“, станува гробница, предупредува Светската здравствена организација, пренесува Би-би-си.
Оттаму констатираат дека околу болницата има тела кои не можат да се однесат во мртовечници или да се закопаат.
Во близина на оваа болница во градот Газа во последните неколку дена се водат жестоки борби, а големиот недостиг на гориво влијае на лекувањето.
Десетици предвремено родени бебиња и 45 бубрежно болни на кои им е потребна дијализа не можат да добијат соодветен третман поради недостиг на електрична енергија.
Директорот на болницата, Мохамед Абу Селмија, изјави дека израелските власти не дале навремена дозвола телата на починатите лица да бидат транспортирани од болницата за погреб, па кучињата влегле во болницата и почнале да ги јадат лешовите.
Според него, седум предвремено родени бебиња починале поради недостиг на кислород бидејќи инкубаторите не работеле поради прекин на струја.
„Неколку други пациенти на кои им е потребна дијализа ризикуваат да умрат во следниот период бидејќи третманот за нив веќе не е достапен“,
рече тој.
Како што пишува Би-би-си, докторот посочил дека тие побарале од Израел помош и евакуација на предвремено родените бебиња, но тоа не се случило.
Абу Селмија рече дека болницата била во контакт и со Црвениот крст за да се обиде да го координира погребот на телата, од кои има околу 150 во болницата – но му било кажано дека тоа во моментов не е изводливо.
„Три предвремено родени бебиња и седум лица починаа поради недостиг на кислород“,
рече тој.
Марк Регев, висок советник на израелскиот премиер Бенјамин Нетанјаху, тврди дека Израел нуди практични решенија за евакуација на бебињата и го обвинува Хамас дека не ги прифаќа предлозите.
И другите болници низ Појасот Газа се исто така без струја.
Израел го обвини Хамас дека има команден и контролен центар под болницата, што раководството на болницата и Хамас го негираат.
Министерството за здравство со кое раководи Хамас соопшти дека оттогаш во Газа се убиени повеќе од 11 000 Палестинци, вклучително и повеќе од 4 500 деца.