Изборите за пратеници би се одржале заедно со редовните претседателски избори, а „Б92“ јави дека се разгледува можноста гласањето да биде во почетокот на април
На 3 април следната година во Србија ќе се одржат вонредни парламентарни избори, заедно со редовните претседателски избори и изборите за членови на Собранието на град Белград, јавува „Б92“.
Како што е потврдено за порталот „Б92“, таквата одлука стои во предлог-договорот меѓу власта и опозицијата во меѓупартискиот дијалог за изборните услови, кој се води без присуство на странци.
Состанокот меѓу претставниците на партиите е во тек, а за текстот од договорот треба да дадат свое мислење и претставниците на опозицијата.
Српскиот претседател и водач на СНС, Александар Вучиќ, најави нови предвремени избори во 2021 година уште минатото лето, веднаш по тогашните парламентарни избори, на 21 јуни 2020 година, што се одржаа без учество на поголем дел од опозициските партии.