Британските медиуми наведуваат дека случаите растат во барем 83 од вкупно 240 земји во светот и дека ги нарушуваат здравствените системи
Светската здравствена организација (СЗО) повикува на мораториум за давање бустер-дози на вакцината против ковид-19 барем до крајот на септември, изјави во средата нејзиниот директор Тедрос Аданом Гебрејесус, на што се спротивставија од САД
Бројот на заразени со коронавирусот во светот вчера надмина 200 милиони, додека делта варијантата на вирусот станува закана за областите со ниска стапка на вакцинација.
Британските медиуми наведуваат дека случаите растат во барем 83 од вкупно 240 земји во светот и дека ги нарушуваат здравствените системи.
„Очајно сакаме оваа пандемија да заврши, но не е така. Нашата битка мора да трае уште малку“,
изјави неделава Рошел Валенски, директорка на американскиот Центар за контрола и превенција на болести.
Досега се заразени најмалку 2,6 проценти од светското население, со веројатно многу поголем реален број, пред се, поради ограниченото тестирање во многу области.
Беше потребна една година за случаите со ковид-19 да стигнат до 100 милиони, додека следните 100 милиони беа пријавени во следните шест месеци. Пандемијата досега е причина за речиси 4,4 милиони смртни случаи.
Земјите што пријавуваат најмногу случаи во седумдневниот просек – САД, Бразил, Индонезија, Индија и Иран, сочинуваат околу 38 проценти од сите случаи во светот, што се пријавуваат секојдневно.
Во САД, сојузните држави со ниски стапки на вакцинација, како што се Флорида и Луизијана, бележат рекорден број хоспитализирани пациенти.
Земјите во Југоисточна Азија, исто така, пријавуваат зголемување на случаите. Со осум проценти од вкупното светското население, континентот бележи речиси 15 проценти од сите глобални дневни случаи, покажува анализата на Ројтерс.
Индонезија, која во јули се соочи со експоненцијален раст на случаите со ковид-19, пријавува најголем број смртни случаи во просек, со што вчера надмина вкупно 100 000 смртни случаи.
Откако мина низ најлошата зараза во април и мај, Индија повторно бележи нагорен тренд во новите случаи. Минатиот петок, земјата пријави 44 230 нови случаи на ковид-19, најмногу во последните три недели, што предизвика загриженост за трет бран, што принуди една од федералните држави да воведе карантин.
Кинескиот град Вухан, каде вирусот првпат се појави кон крајот на 2019 година, ќе ги тестира своите 12 милиони жители за коронавирус, откако беа потврдени првите локално пренесени случаи на делта варијантата. Градот нема пријавено локални случаи на инфекција од средината на мај минатата година.
Трета доза, да или не?
ЦДЦ во внатрешен документ соопшти дека делта варијантата, првпат откриена во Индија, е заразна како сипаниците и многу повеќе заразна од обичната настинка или грип.
Григориј Поланд, научник за вакцинација на клиниката Мајо, изјави дека сегашните вакцини нема да стават крај на инфекцијата.
„Сега сме во сценарио што сами го предизвикавме, и ќе ни требаат години или децении да ја победиме пандемијата … Ќе се обидеме да ги фатиме новите варијанти се додека не го добиеме типот на вакцината што ќе нуди блокирање на инфекцијата“,
рече Поланд.
Многу земји продолжуваат да се соочуваат со недостаток на опрема за тестирање, лекови и вакцини, додека делта варијантата ги оптоварува здравствените системи во посиромашните земји. Побогатите нации се повикани да донираат повеќе вакцини за да го спречат растот на заразените на глобално ниво.
Светската здравствена организација (СЗО) повикува на мораториум за давање бустер-дози на вакцината против ковид-19 барем до крајот на септември, изјави во средата нејзиниот директор Тедрос Аданом Гебрејесус.
„Ова ќе овозможи најмалку 10 проценти од населението во секоја земја да се вакцинира. Разбирам дека сите влади сакаат да го заштитат својот народ од делта варијантата. Но, не можеме да прифатиме дека земјите што веќе користеле поголем дел од глобално достапната вакцина сакаат да ја користат уште повеќе”,
рече тој.
Белата куќа го отфрли повикот на СЗО за прекин на третата доза на вакцината против ковид-19, оценувајќи дека САД не треба да бираат помеѓу давање трета доза на своите граѓани и донирање на вакцините на трети земји.
„Тоа е погрешна алтернатива. Сметаме дека можеме да ги направиме и двете и дека не треба да избираме помеѓу вакцинирање на Американците, што се уште не е официјално планирано, и помагање на сиромашните земји“,
рече Џен Псаки, портпаролка на Белата куќа, коментирајќи го повикот на СЗО.
САД се уште немаат донесено одлука за ревакцинацијата, а Германија и Израел одлучија да го сторат тоа, пред се за постарите граѓани.