Дел од прашањата што кон неа ги упати Рашковски беа во врска со тоа дали како генерален секретар тој секогаш си ги извршувал обврските, на што таа му одговори потврдно. Исто така, рече и дека тој никогаш не ѝ вршел притисок во постапките за јавни набавки и не ѝ дал насока да дисквалификува некоја фирма
Набавката на софтверот за мерење брзина на возила не била дел од годишниот план за јавни набавки на Генералниот секретаријат на Владата. Меѓутоа, потоа со измените и дополнувањата била вметната.
Вака денеска сведочеше поранешна вработена во Генералниот секретаријат на Владата, Анета Стефковска, која била раководител на Секторот за јавни набавки, на рочиште за набавката на овој и на софтверот за биометриска идентификација во случајот каде што првообвинет е поранешниот генсек на Владата, Драги Рашковски.
Според нејзиното сведочење, тоа е редовна практика, а вметнувањето на оваа набавка било по барање на Рашковски, со оглед дека тој во тоа време бил одговорно лице во институцијата.
На прашање на обвинителката Ивана Трајчева за тоа кој ја изготвувал техниката спецификација за набавката, сведокот одговори:
„Најчесто доаѓаше од кабинетот на генералниот секретар, најчесто лично од него, понекогаш ни го испраќаше лицето Игор Христов (обвинет во постапката).“
За тоа кој ја вршел евалуацијата на понудите, Стефковска одговори дека целокупното оценување се вршело од страна на комисија назначена за спроведување на постапката, но во техничкиот дел често се консултирале, и тоа најчесто со обвинетиот Игор Христов.
За софтверот за биометриска идентификација, пак, таа рече дека не се сеќава дали бил дел од годишниот план за набавки, а ако не бил, тогаш сигурно било вметнато со измените и дополнувањата.
И за овој софтвер одговори дека веројатно за техничките спецификации на понудите при евалуацијата се консултирале со Христов.
Стефковска го потврди и сведочењето на едно од минатите рочишта дека од Дирекцијата за заштита на личните податоци им пратиле предупредување.
„Беше нешто во врска со предметната постапка, во смисла да ги имаме предвид одредбите од Законот за заштита на лични податоци. Веднаш го известив Драги Рашковски за дописот. Колку што се сеќавам, мислам дека ми личеше како да е веќе запознаен со дописот, ми рече ‘да знам’, но и нешто во смисла дека не треба да се секирам дека тој допис ја засега оваа постапка во насока дека предметниот софтвер немало да користи за такви податоци или дека не сме во таа фаза кога треба да известиме некого“,
сведочеше Стефковска.
Меѓу прашањата што кон неа ги упати Рашковски, пак, беа во врска со тоа дали како генерален секретар тој секогаш си ги извршувал обврските, на што таа му одговори потврдно. Исто така, рече и дека тој никогаш не ѝ вршел притисок во постапките за јавни набавки и не ѝ дал насока да дисквалификува некоја фирма.
Обвинението во овој случај, покрај набавката на софтверите, опфаќа и исплата на хонорари од кои, според Обвинителството, ексгенералниот секретар дел зел за себе.
Кривичните дела за кои се гони Рашковски се злоупотреба на службената положба и овластувања и перење пари. Со него се обвинети уште шест лица поврзани со фирмата „Инвока“ од која бил купен софтверот за сообраќајни прекршоци, но и лица кои биле соработници, а некои од нив и хонорарци во Владата: Ивица Димитровски, Игор Христов, Даниел Станчев, Ирена Ивановска, Игор Ивановски и Маја Силјановска.
Случајот за Рашковски го отвори „360 степени“ откако во март лани објавивме дека Генералниот секретаријат на Владата, додека со него раководеше Рашковски, купил софтвер за сообраќајни прекршоци вреден 81 000 евра, иако ниедна институција ниту го барала ниту го користи, како и дека пред да го купи, како генерален секретар на Владата, тој лично развил таков софтвер за сообраќајни казни и го патентирал.
Рашковски тврдеше дека софтверот треба да биде дел од т.н. „Сејф сити“, но единствената институција со право да казнува, Министерството за внатрешни работи, брзо ја урна тезата на Рашковски со ставот дека ниту барало ниту планира да го користат софтверот за кој никој не го прашал.
Набргу потоа Обвинителството за гонење организиран криминал и корупција отвори предистрага, а потоа и истрага. Во истрагата беа споени и други предмети, а на 8 октомври лани беше поднесено обвинение. Кривичен го прифати во целост обвинението на 29 декември 2021.